Mälim bolşy ýaly, ukynyň adam saglygyna we özüni duýşuna täsiri örän uly. Şonuň üçin hem köplenç ukusyzlygyň howpy hakynda, şeýle hem köp uklamagyň zyýanynyň kiçi-girim däldigi barada aýdylýar. "ScienceAlert" neşiri köp uklamagyň saglyga ýetirýän täsirini anyklamak üçin uky barlagçylaryndan we neýrobiologlardan ybarat bolan 26 sany hünärmen bilen pikir soraşma geçirdi.
Pikir soralyşygynyň dowamynda hünärmenleriň biri ukynyň iň kadaly mukdarynyň dowamly ýedi sagatdygyny, şondan artyk ukynyň zyýanlydygyny aýtdy.
Harward uniwersitetiniň hünärmeni ukynyň dowamlylygyny ýokarlandyrmagyň bedene oňyn täsir edýändigini aýtdy. Onuň pikiriçe, köp uky gan basyşyny ýokarlandyrýar, agyrylary peseldýär we insuline duýgurlygy ýokarlandyrýar.
Beýleki hünärmenleriň käbiri uzak uky bilen saglygyň ýaramazlaşmagynyň arabaglanyşygyna tersine garamalydygyny bellediler. Sebäbi adam saglyk meseleleri sebäpli hem uzak wagtlap uklap bilýär. Gündogar Wirjiniýa Lukmançylyk mekdebiniň hünärmeni bolsa sagdyn adamyň artykmaç uklap bilmejekdigini aýtdy.
Netijede, materialyň awtorlary aşa köp ukynyň saglyga ýaramaz täsir etmek ähtimallygy ýok diýen netijä geldiler. Başga bir tarapdan, beden adatdakysyndan has köp uky talap edýän bolsa (ulular üçin 7-8 sagatdan köp), lukmana ýüz tutmak dogry bolar diýip, çeşme belleýär.
