Türkmenistanda ýokanç keselleriň ýaýramagynyň öňüni almak maksady bilen, ýolagçy demir ýol gatnawlaryna girizilen çäklendirmeleriň möhleti 1-nji iýula çenli uzaldyldy.
«Demirýollary» AGPJ-niň resmi saýtynda habar berlişi ýaly, ýurduň içinde häzirki wagtda öňüni alyş çärelerini berjaý etmek şerti bilen diňe synag gatnawlary arkaly syýahat etmek bolýar.
Her hepdäniň çarşenbe we anna günleri Aşgabat - Mary - Türkmenabat ugry boýunça, penşenbe we şenbe günleri Türkmenabat - Mary - Aşgabat ugry boýunça synag tertipde gatnawlar hereket edýär.
Ýekşenbe günleri Aşgabat - Daşoguz, duşenbe güni Daşoguz - Aşgabat ugry boýunça ýolagçy gatnawlary amala aşyrylýar.
Demir ýol peteklerini wokzallardaky kassalardan, şeýle hem «Demirýollary» AGPJ-niň resmi saýtyndan satyn alyp bolar.
«Awaza» milli syýahatçylyk zolagynda dynç alşy guramak maksady bilen, şu ýylyň 1-nji iýunyndan başlap, Türkmenistanda Aşgabat - Türkmenbaşy - Aşgabat ugry boýunça ýörite demir ýol gatnawy işe giriziler.
