“Xiaomi”-niň önümçilik eko ulgamynyň bir bölegi bolan “InkPalm Technology” kompaniýasy “InkPalm 5” kiçi elektron kitabyny çykardy. Kitap diýseň inçe we ýeňil bolup, onuň galyňlygy 6,9 mm, agramy bolsa 115 gr boldy diýip, mobile-review.com habar berdi.
Enjamyň ekranynyň diagonaly 5,2 dýuýma, ölçegi 1280x720 piksele (piksel dykyzlygy - 284 ppi) barabar. Kitabyň ekrany aýna bilen örtülendir, bu bolsa onuň duýgurlygyny ep-esli ýokarlandyrýar. Ekranyň aşagynda basylýan düwmeler ýerleşdirilipdir.
Enjamyň işleýşine 1 Gb RAM we 32 Gb içerki ýat bilen utgaşyklykda, dört ýadroly prosessor jogap berýär. Kitap 1400 mAh akkumulýator bilen üpjün edilýär we enjam Android 8.1 operasiýa ulgamynda işleýär. "InkPalm 5"-iň üçünji tarap programmalarynyň gurulmagyny, şeýle hem elektron kitaplaryň import edilmegini goldaýandygy bellendi.
