Bütindünýä Saglygy Goraýyş Guramasy "AstraZeneca" koronawirusa garşy sanjymyny ulanmagy dowam etmegi maslahat berýär. Bu barada guramanyň sanjymlaryň howpsuzlygyna jemleýji baha berilmegi bilen bagly beýanatyna salgylanyp, Sputnik gullugy habar berýär.
Dünýäde Fransiýa, Germaniýa, Italiýa we Gollandiýa ýaly ondan gowrak ýurt sanjym edilenlerde ýüze çykýan tromboemboliki meseleler baradaky maglumatlar sebäpli "AstraZeneca" sanjymyny togtatdy. Habar beriş serişdeleri bu sanjymyň ölüm howpy barada ýazsalar hem, sanjym sebäpli ölümiň bolandygyny görkezýän subutnama häzire çenli ýok. Ähli hadysalar Ýewropa düzgünleşdirijisi tarapyndan derňelýär we “AstraZeneca”-ny ulanmak resmi taýdan gadagan edilmedi.
"Bütindünýä saglygy goraýyş guramasy häzirki wagtda" AstraZeneca" sanjymynyň peýdasynyň onuň howpundan has ýokarydygyna ynanýar we sanjymyň dowam etdirilmegini maslahat berýär" -diýlip, BSGG-niň beýanatynda aýdylýar.
BSGG we Ýewropa Derman agentligi "AstraZeneca"-nyň howpsuzlygy barada iň täze maglumatlar üçin hemişe işjeň aragatnaşykda.
"AstraZeneca" sanjymynyň howpsuzlygy baradaky gutarnykly kararyň BSGG tarapyndan 18-nji mart, penşenbe güni yglan edilmegine garaşylýar.
Şol bir wagtyň özünde sanjymy dörediji kompaniýanyň özi, bir gün öň dermanyň düýbünden howpsuzdygyny aýdypdy.
