Gyrgyzystan dünýäniň çar künjeginden bolan daşary ýurtly syýahatçylar üçin öz serhetlerini açdy. Koronawirus pandemiýasy sebäpli girizilen çäklendirmeleriň ýatyrylýandygy barada Gyrgyzystanyň Daşary işler ministrliginiň saýtynda habar berildi.
"4-nji dekabrdan daşary ýurt raýatlary we raýatlygy bolmadyk adamlar Gyrgyzystana yzygiderli uçuşlar bilen baryp bilerler" -diýip, ministrlik habar berýär hem-de uçara münülende tabşyrylanyna 72 sagat geçmedik koronawirus üçin PCR synagynyň netijelerini görkezmegiň zerurdygyny ýatladýar.
Mundan başga-da, metbugat beýanynda görkezilişi ýaly, Gyrgyzystana gelensoň hem sanitariýa we karantin nokatlarynyň işgärleri tarapyndan synag netijeleriniň bardygy barlanylar. Uçuşyň dowamlylygy ýa-da gatnawyň gijä galmagy bilen baglanyşykly sebäpler bilen synag netijesiniň möhletiniň gutarandygy ýüze çyksa, daşary ýurt raýatlary we raýatlygy bolmadyk adamlar şol ýerde täzeden PCR synagyndan geçmeli bolarlar.
