2012-nji ýyldan bäri birinji gezek Apple kompaniýasynyň güýzki tanyşdyrylyş dabarasynda täze iPhone tapgyry hödürlenilmedi. Onda diňe täze Apple Watch bilen iPad görkezildi. Bu barada eanews.ru habar berýär.
15-nji sentýabrda kompaniýa täze önümlerini görkezdi. Tanyşdyrylyş dabarasy koronawirus pandemiýasy sebäpli wirtual ýagdaýda geçdi. Onuň görkezilişi Kupertinoda “Apple Park” şäherçesinden alnyp baryldy.
Tanyşdyrylyşyň esasy mowzugy ulanyjynyň ganynyň düzümindäki kislorodyň derejesine gözegçilik ediji funksiýasy bolan Apple Watch Series 6 sagatlary boldy. Gajet ukynyň dowamlylygyny hem bellige alýar we elleri dogry ýuwmak üçin zerur wagty kesgitleýär.
Mundan başga-da, birinji nesliň Apple Pencil-ine eýe bolan arzan iPad 8 we iPad Air hödürlenildi, şeýle-de wideo-türgenleşikli sport serwisi Apple Fitness+ we pes bahalary bilen ulanyjylary kompaniýanyň hyzmatlaryna çekjek Apple One abunasy anons edildi.
Hünärmenler iPhone 12-niň tanyşdyrylyşy oktýabra bellenilen täze önümleriň satuwyna ýakyn bolar diýip çaklaýarlar. Bu ýylda diagonaly 5,4 dýuým we 6,1 dýuým bolan iPhone 12, şeýle-de 6,1 we 6,7 dýuým ekranly iPhone 12 Pro hödürleniler.
