Seçenow adyndaky Moskwa döwlet lukmançylyk uniwersitetiniň hünärmenleri SARS-CoV-2 koronawirusyna garşy dünýäde birinji sanjymyň synagynyň üstünlikli tamamlanandygyny habar berdiler. Muny russian.rt.com ýetirýär. Ýakyn wagtda tejribä gatnaşan meýletinçiler adaty durmuşyna dolanyp bararlar, olary goýbermek 15 we 20-nji iýula bellenilen. Olaryň saglygyna we immunitet ýagdaýyna lukmanlar gözegçilik ederler. Alymlar sanjymyň düzüminde koronawirusyň ýokdugyny habar berdiler, ýagny gürrüň serişdäniň emeli döredilendigi barada gidýär.
“Synag üstünlikli geçdi, sanjymyň howpsuzlygy tassyklanyldy. Ol adamlarda ulanylýan, häzir bazarda bar bolan sanjymlaryň howpsuzlygyna deň gelýär” – diýip, Seçenow uniwersitetiniň transmissiýa keselleriniň institutynyň müdiri Aleksandr Lukaşew belleýär.
Onuň aýtmagyna görä, synagdan öň meýletinçiler doly derejede barlagdan geçirildi, şol sanda koronawirusa garşy antibedenjikleriň ýoklugy hem barlanyldy.
Synagyň başlaýandygyny 18-nji iýunda Russiýanyň Saglygy goraýyş ministrliginiň metbugat gullugy habar berdi. Şonda edarada barlaga 38 meýletinçiniň gatnaşýandygyny aýtdylar. Barlaga gatnaşyjylaryň hataryna 18-den 65 ýaş aralygyndaky erkekler we aýallar girdi. Lukaşew meýletinçileriň iki topara bölünendigini, birinji toparyň bir doza sanjymy, ikinji toparyň ikisini alandygyny belledi. Lukmanyň aýtmagyna görä, bedeniň temperaturasynyň ýokarlanmagyndan başga, sanjym goýberilenden soňky birinji günlerde meýletinçilerde hiç hili negatiw täsirlenmeler ýüze çykarylmady, olaryň ählisi özüni gowy duýýardy.
Russiýada bir gije-gündizde COVID-19-yň 6615 sany täze ýagdaýy hasaba alyndy. Epidemiýanyň başlananyndan bäri ýurtda COVID-19 keseli 727 162 adamda tassyklanyldy, olardan 501 müňden gowragy eýýäm sagaldy (3615 sanysy soňky gije-gündizde). Şu wagta çenli 11 335 sany ölüm bellige alyndy.
