«Türkmendemirýollary» agentliginiň ýolagçy biletlerini onlaýn usulda satmak üçin çykaran «Railways» mobil programmasynyň Android ulgamy üçin täze görnüşi elýeterli edildi. Agentligiň resmi saýtynyň habar bermegine görä, programmanyň täze görnüşinde ýolagçylaryň bilet almagyny aňsatlaşdyrjak ençeme täze funksiýalar goşuldy.
Mundan beýläk ýolagçylar bilet almak üçin ulanýan kartlarynyň maglumatlaryny mobil programmanyň ýadynda saklap bilerler. Munuň üçin programmada "Başga" bölümine girip, "Töleg kartlary" düwmesine basyp kartyň maglumatlaryny girizmeli.
Şeýle-de, täze görnüşde biletler bölümine gözleg funskiýasy goşuldy. Ýolagçylar stansiýasy, familiýasy, ady we alnan senesine görä, alnan biletleri gözleg edip bilerler.
Şeýle hem bellenilişi ýaly, täze görnüşde esasy täzelikleriň biri hem, mundan beýläk ýolagçylaryň “Senagat bank” kartlary arkaly hem biletleri satyn alyp bilmegidir. Bulardan başga hem, programmanyň umumy işleýşi optimizirlendi we programmadaky kiçi ýalňyşlyklar düzedildi.
Şeýle hem şu salgydan «Türkmendemirýollarynyň» ýolagçylara hödürleýän VIP wagon hyzmatlary barada okap bilersiňiz.
