COVID — 19 zerarly dörän oňaýsyz täsirleri peseltmek boýunça köpçülikleýin çäreler maslahatlaşyldy

GDA gatnaşyjy döwletleriň durmuş-ykdysady ýagdaýy barada pikir alyşmalar hem-de COVID — 19 pandemiýasy zerarly ýüze çykan oňaýsyz täsirleri peseltmek boýunça köpçülikleýin çäreleriň mümkinçilikleri baradaky meseleler Garaşsyz Döwletleriň Arkalaşygynyň Ykdysady geňeşiniň wideomaslahat görnüşinde geçirilen 86-njy mejlisiniň esasy gün tertibini düzdi.
Mejlisiň barşynda döwletara söwda-ykdysady hyzmatdaşlygynyň ileri tutulýan ugurlary, şeýle-de Arkalaşygyň agza ýurtlarynyň arasynda özarabähbitli gatnaşyklaryň kadalaşdyryjy-hukuk binýadynyň pugtalandyrylmagynyň meseleleri ara alnyp maslahatlaşyldy.
Mejlisiň dowamynda Moskwa şäherinde Halk hojalygynyň gazananlarynyň sergisiniň çäklerinde GDA-nyň agza döwletleriniň sergi söwda merkezleriniň döredilmegi boýunça alnyp barylýan işler, 2016-njy ýylyň 28-nji oktýabrynda GDA-nyň Hökümet Baştutanlarynyň Geňeşiniň karary bilen tassyklanylan GDA-nyň agza döwletleriniň intellektual eýeçiligi bazarynyň döredilmeginiň we ösdürilmeginiň Konsepsiýasynyň durmuşa geçirilişi hem-de beýlekiler bilen bagly meselelere seredilip geçildi.
Şonuň ýaly-da, 2020–2025-nji ýyllar döwür üçin Halkara gatnawlarynda ýük daşamalarynyň durmuşa geçirilmeginde Garaşsyz Döwletleriň Arkalaşygynyň agza döwletleriniň çäklerinde ulag howpsuzlygynyň üpjün edilmeginiň Strategiýasynyň durmuşa geçirilmegi boýunça çäreleriň Meýilnamasynyň, 2020–2024-nji ýyllar döwür üçin Onkologiki kesellere garşy göreşmek ulgamynda Garaşsyz Döwletleriň Arkalaşygyna gatnaşyjy döwletleriniň hyzmatdaşlyk etmeginiň Konsepsiýasynyň durmuşa geçirilmegi boýunça çäreleriň Meýilnamasynyň we beýleki birnäçe resminamalaryň taslamalary duşuşyga gatnaşyjylaryň garamagyna hödürlenildi.
Duşuşygyň gün tertibine girizilen meseleleriň ara alyp maslahatlaşylmagynyň jemleri boýunça hemmetaraplaýyn hyzmatdaşlygyň dürli ugurlary boýunça taraplaryň özarahereketlerini kadalaşdyrýan birnäçe resminamalara gol çekildi.