Türkmenistan «Milli VISA karty» atly täze bank kartyny ulanyşa girizmäge taýýarlyk görýär

Türkmenistanyň Döwlet daşary ykdysady iş banky nagt däl hasaplaşyklaryň gerimini giňeltmek maksady bilen «Milli VISA karty» atly täze bank kartyny ulanyşa girizmek boýunça degişli işler geçirýär. Bu barada Hökümet mejlisinde wise-premýer G.Müşşikow döwlet Baştutanyna hasabat berdi.
Wise-premýer munuň ýurdumyzyň bank ulgamyny mundan beýläk-de ösdürmek hem-de milli töleg ulgamyny döwrebap halkara ulgama birikdirmek üçin giň mümkinçilikleri açýandygyny belledi.
Mejlisiň barşynda şeýle hem halk hojalyk toplumynyň pudaklaryny döwrebaplaşdyrmak, ýurdumyzyň karz beriji edaralary tarapyndan döwrebap maglumat-kommunikasiýa tehnologiýalary esasynda edilýän hyzmatlaryň hilini ýokarlandyrmak barada habar berildi.
Gurbanguly Berdimuhamedow hasabaty diňläp, bu toplumyň durnukly işlemeginiň ýurdumyzyň ykdysadyýetiniň bäsdeşlige ukyplylygyny ýokarlandyrmagyň, onuň dünýäniň ykdysady giňişligine sazlaşykly goşulyşmagynyň möhüm şerti bolup durýandygyny belledi. Şunda bank önümlerini halkara derejä çykarmak arkaly olaryň sanyny artdyrmak, ugurdaş edaralaryň işine öňdebaryjy tejribäni hem-de innowasion tehnologiýalary ornaşdyrmak esasy wezipeleriň hatarynda durýar.
Şunuň bilen baglylykda, döwlet Baştutany «Milli VISA kartyň» täze görnüşini dolanyşyga girizmek boýunça işleri işjeňleşdirmegiň zerurdygyny nygtady hem-de wise-premýere birnäçe anyk tabşyryklary berdi.