ABŞ amerikan kompaniýalarynyň Huawei bilen işleşmegine gadaganlygy aýyrar

ABŞ-nyň söwda ministrligi 5G aragatnaşyk ulgamyny döretmegiň çäklerinde amerikan kompaniýalarynyň hytaý kompaniýasy Huawei bilen hyzmatdaşlygyna goýlan çäklendirmeleri aýyrjakdygyny tassyklady. Bu barada interfax.ru habar berýär.
Birleşen Ştatlar “hytaý kompaniýasy Huawei bilen biznes alyp barýan amerikan kompaniýalary üçin olara indiki nesliň 5G torlary üçin standartlary döretmegiň üstünde bilelikde iş alyp barmaga mümkinçilik berer ýaly özüniň goýan gadaganlygyny gözden geçirjekdigini” tassyklaýar – diýlip, twitterde ministrligiň habarnamasynda aýdylýar.
Habarnama ABŞ-nyň söwda ministri Uilbur Rossanyň “ABŞ-nyň dünýä innowasiýasynda liderligini elinden gidirmejekdigi” aýdylýan beýannamasy hem berkidilen. Onuň aýtmagyna görä, dünýä normalaryny işläp düzmäge ýurduň gatnaşmagy sürüjisiz ulaglaryň, emeli intellektiň we “beýleki döwrebap tehnologiýalaryň” geljegine täsir eder.
“Ministrlik amerikan senagaty Birleşen Ştatlaryň tehnologiýalaryny dünýä standartyna öwürmek prosesinde doly derejede hereket eder ýaly, ony höweslendirmek ýoly bilen ABŞ-nyň milli howpsuzlygyny we daşary syýasy gyzyklanmalaryny goramaga borçly” – diýlip, Rossanyň beýannamasynda aýdylýar.
Amerikan resmi wekilleriniň nygtamagyna görä, Huawei HHR hökümetiniň gyzyklanmalary bilen işleýär. Hytaý kompaniýasynyň tehnologiýalarynyň beýleki ýurtlar tarapyndan ulanylmagy Pekine döwlet syrlaryna ýol açýar we milli howpsuzlyga howp salýar.
Şunuň bilen baglylykda ABŞ Huawei kompaniýasyny gara sanawa girizdi we amerikan kompaniýalaryna oňa elektron tehnikalarynyň önümçiligi üçin toplumlary satmagy gadagan etdi. Ýöne bu gadaganlygyň güýje girizilmesi ençeme gezek soňa goýuldy.