20-nji iýunda Türkmenistanda Mejlisiň altynjy çagyrylyşynyň onunjy maslahaty geçiriler

Mejlisiň altynjy çagyrylyşynyň şenbe güni geçiriljek onunjy maslahatyna görülýän taýýarlyk işleri barada Milli parlamentiň ýolbaşçysy G.Mämmedowa Türkmenistanyň Prezidentine habar berdi.
Bu maslahatda deputatlar ýurdumyzyň kanunçylyk ulgamyny döwrebaplaşdyrmak, milli ykdysadyýetimiziň pudaklarynyň işjeň ösdürilmegine ýardam berýän täze kanunlary işläp taýýarlamak hem-de şunuň bilen baglylykda ýüze çykýan meseleleriň çözgüdini dessin kesgitlemek boýunça öňde durýan wezipeleri ara alnyp maslahatlaşarlar.
Döwlet Baştutany halk hojalyk toplumynyň dürli ulgamlarynda alnyp barylýan giň gerimli işleri kanunçylyk taýdan berkitmek maksady bilen, Türkmenistanyň kanunçylyk-hukuk binýadyny mundan beýläk-de kämilleşdirmegiň zerurdygyny belledi. Türkmen Lideri bu wezipeleri çözmek üçin Mejlisiň işine halkara nazarýetinde hem-de hukuk işinde toplanylan öňdebaryjy tejribäniň işjeň ornaşdyrylmalydygyny belledi.
Döwlet Baştutany Mejlisiň altynjy çagyrylyşynyň onunjy maslahatynyň gün tertibine giriziljek meselelere, olar boýunça kabul ediljek çözgütlere möhüm ähmiýet berilmelidigine ünsi çekip, bu işleriň milli kanunçylygymyzyň döwrebaplaşdyrylmagy bilen baglylykda ähmiýetini nygtady.