Daşoguz we Balkan welaýatlarynda galla oragyna girişildi

12-nji iýunda Daşoguz we Balkan welaýatlarynyň ekerançylary güýzlük bugdaý oragyna girişdiler. Möwsümiň başlanmagyna Ministrler Kabinetiniň 29-njy maýda geçirilen mejlisinde ak pata berildi.
Belläp geçsek, toprak-howa şertlerine laýyklykda, oraga Ahal, Lebap we Mary welaýatlarynyň gallaçylary 5-nji iýunda girişipdi.
Daşoguz welaýatynyň bugdaý ýetişdirilen meýdany 145 müň gektara barabar bolup, şonça ýerden gallaçylar 265 müň tonna däne taýýarlamagy maksat edinýärler. Ýerli gallaçylar sebitiň toprak-howa şertlerinde özüni oňat görkezen bugdaýyň ýokary hasylly görnüşlerini ekdiler.
Galla — 2020-de däne orujy kombaýnlaryň 449-sy, esasan, ABŞ-nyň «John Deere» hem-de Germaniýanyň «CLASS» kompaniýalarynyň kombaýnlary ulanylar.
Meýdanlardan ýygnalyp alnan bugdaýy kabul ediş bölümlerine daşalmagyny ýük awtoulaglarynyň 2245-si üpjün eder. Guradylandan we deslapky arassalanandan soň dänäniň bir bölegi tohumlyk üçin goýlar, galan bugdaý bolsa un üçin gaýtadan işleniler, şeýle hem Görogly, Boldumsaz, S.Türkmenbaşy adyndaky we beýleki etraplardaky elewatorlarda saklanylmaga goýlar.
Balkan welaýatynyň gallaçylarynyň döwlet buýurmasy 80 müň tonna dänä barabardyr. Günbatar sebitde 50 müň gektar ýer, esasan, Serdar hem-de Bereket etraplarynyň daýhan birleşikleriniň ekerançylyk ýerleri güýzlük bugdaý üçin bölünip berildi.
Bugdaýy kabul ediş bölümlerine daşalmagyny ýük awtoulaglarynyň 900-si üpjün eder. Orak döwründe göçme abatlaýjy-mehaniki toparlaryň 26-sy işlär. Däne orujy kombaýnlaryň bolsa 180-si ulanylar.