Ýaponiýada suw howuzlary üçin gorag maskalary döredildi

Ýaponiýada suw howuzlarynda ýüzüp bolar ýaly gorag maskalary döredildi. Bu barada “Asahi” gazetine salgylanmak bilen regnum.ru habar berýär.
Ýaponiýada koronawirus epidemiýasynyň howpy bilen baglylykda ýapylan suw howuzlary öz işini 1-nji iýundan dikeltdiler. Häkimler suwda hloruň ýeterlik konsentrasiýasy bolan ýagdaýynda keselleme howpunyň pesdigini belleýärler. Şunuň bilen baglylykda kesellemeden gorajak, ýöne şol bir wagtda öl bolmajak we suwda gaçmajak maskanyň zerurlygy ýüze çykdy.
Bu meseläniň çözgüdi Tokiodaky kiçiräk bir kompaniýa tarapyndan tapyldy. Ýüzmek üçin niýetlenilen maska dury materialdan taýýarlanan we ol ýüzüň aşaky bölegini ýapýar. Ýöne ol sypyp gaçmaýar, çünki maska suwda ýüzüp bolar ýaly edip döredilen.
Ilkibaşda maskalar elde taýýarlanyldy, ýöne oňa bolan islegiň ýokary bolandygy üçin ol önümçilige goýberildi. Bu maskalaryň ykjamdygy we netijelidigi ýüzmek boýunça klublaryň assosiasiýasy tarapyndan kabul edildi, oňa ýurduň ähli ýerindäki 700 guramadan eýýäm 16 müň sargyt gelip gowuşdy. Bu maskalara, esasan, çagalaryň ýüzüş mekdeplerinde isleg bildirildi, çünki tälimçiler suwda çaganyň duruş ýagdaýyny wagtal-wagtal düzedip durmak bilen, olara eşider ýaly gaty sesde buýruk bermeli bolýarlar.
Statistika boýunça, Ýaponiýada 17 müň adam koronawirus bilen kesellän, 915 adam ýogaldy, 14,9 müň adam sagaldy.