Bundesliga ýene dolanýar

Bundesliganyň oýunlary 15-nji maýda dikeldiler. Bu barada Germaniýanyň federal we sebitleýin hökümeti ylalaşyga geldiler. 16-njy martda ýatyrylan futbol boýunça milli Çempionat koronawirusyň ýaýramagyna ýol bermezlik üçin tomaşaçysyz geçer, sosial aradaşlygy saklamak çäreleri ýurtda entek 5-nji iýuna çenli dowam eder. Bu barada Euronews habar berýär.
Germaniýanyň kansleri Angela Merkel şeýle belleýär: “Biz köp meseleleri, şol sanda müşderileriň sanyny artdyrmak, işjeň dynç alşy we güýmenjeleri ýene dikeltmek üçin sanitar kadalaryny berjaý etmek bilen biznesden çäklendirmäni aýyrmak, şeýle-de tassyklanylan we barlanylan düzgünleriň çäklerinde maýyň ikinji ýarymynda dikeldilip bilinjek Bundesliganyň oýunlary meselesini hem maslahatlaşdyk”.
Koronawirus pandemiýasy sebäpli futbol boýunça milli çempionatlar Fransiýada we Niderlandiýada wagtyndan öň tamamlandy, Belgiýada bolsa professional futbol klublarynyň ýaryşlary 31-nji iýula çenli gadagan edildi.
Ispaniýanyň futbolistleri eýýäm türgenleşige başladylar, ähli oýunçylar koronawirus üçin testden geçirilýär. Ispan ligasy oýunlary iýunda başlamakçy we möwsümi tomusda tamamlamakçy bolýar.
Italiýanyň sport ministrliginde çempionaty hatda iýunyň ortalarynda-da dikeltmek barada gürlemäge esasyň ýokdugyny belleýärler.
Portugaliýanyň birinji çempionat ligasynyň soňky on oýny maýyň ahyrynda başlanar. Türgenler duşenbe gününden bäri türgenleşýärler, ýöne ýaryşlar ýapyk gapylarda geçiriler.
Beýik Britaniýanyň hökümeti Angliýanyň premýer-ligasyny dikeltmek boýunça meýilnama işläp düzdüler, indiki hepdede klublar bu barada özleriniň pikirini aýdarlar.