FIFA “ýaz-güýz” ulgamyna geçmek mümkinçiligini gözden geçirýär

Halkara futbol federasiýasynyň (FIFA) “ýaz-güýz” ulgamyna geçmegi mümkin, bu barada, Trend TACC-a salgylanmak bilen bellemegine görä, FIFA-nyň wise-prezidenti Wiktor Montalýani habar berdi.
Şeýle çäre koronawirus pandemiýasy bilen şertlendirilen, çünki bu pandemiýa sebäpli ähli resmi halkara oýunlaryň geçirilmesi hem togtadyldy. 
“Koronawirus pandemiýasy bilen baglylykda FIFA özüniň käbir ýörelgelerini üýtgetmeli bolýar. Häzir futbol möwsüminiň ykbaly boýunça karara gelmek hökümet edaralaryna bagly bolup durýar we FIFA hem bu barada dawa etmek islemeýär. Ýöne bizde senenamany üýtgetmek barada pikir bar, şol senenamanyň täze wersiýasy hem 2024-nji ýyla çenli niýetleniler. “Güýz-ýaz” adaty shemanyň deregine esas hökmünde ýyllyk senenama ulgamy, ýagny “ýaz-güýz” ulgamy kabul edilip bilner” – diýip, Montalýani belleýär.
“Bizde üýtgeşmeleri girizmäge mümkinçilik bar, sebäbi indiki dünýä çempionaty 2022-nji ýylda noýabr-dekabr aýynda Katarda geçer. Ähtimal, hemişelik esasda üýtgeşmeleri kabul etmek barada pikirlenmek gerekdir” – diýip, ol sözüniň üstüne goşýar.
Täze koronawirus ýaýrawy 2019-njy ýylyň ahyrynda Merkezi Hytaýda bellige alyndy we ol dünýäniň köp ýurduna ýaýrady. Bütindünýä saglygy goraýyş guramasy ony pandemiýa diýip yglan etdi.