Tokiodaky Olimpiadanyň ýatyrylmagy mümkin

Ýaponiýada eger-de koronawirus pandemiýasy indiki ýyl hem howp döretjek bolsa, onda Tomusky Olimpiýa oýunlarynyň ýatyrylmagynyň mümkindigi bellenilýär. Bu barada “Tokio-2020”-iň guramaçylyk komitetiniň prezidenti Ýosiro Mori mälim etdi, muny Euronews habar berýär. Olimpiadanyň 2021-nji ýylyň iýulyna geçirilmegi baradaky ylalaşyk mart aýynyň ahyrynda gazanyldy.
Ýaponiýanyň lukmançylyk assosiasiýasynyň ýolbaşçysy dermanlary we sanjymlary taýýarlamak işini çaltlandyrmagyň möhümdigini belledi. “Men bizde netijeli sanjym bolmasa Olimpiadany geçirmek kyn bolar diýip pikir edýärin. Men Oýunlary geçirmeli däl diýemok, ýöne muny sanjymsyz geçirmek örän kyn bolar” – diýip, ol aýdýar.
Hünärmenleriň köpüsi täze görnüşli koronawirusa garşy sanjymyň indiki ýylyň ortalarynda peýda boljakdygyna ynanýarlar. Ýaponiýa bäsleşikleri taýýarlamak işine 12 milliard dollardan gowrak sarp etdi. Çykdajylary azaltmak üçin “Tokio-2020”-iň guramaçylyk komitetiniň prezidenti Olimpiýa we Paralimpiýa oýunlarynyň açylyş we ýapylyş dabarasyny birikdirmegi teklip etdi.