“PSŽ” Fransiýanyň çempiony diýlip yglan edildi

Fransiýanyň professional futbol ligasy (LEP) “Pari Sen-Žermeni” resmi taýdan 2019/20-möwsümde Fransiýanyň çempiony diýip yglan etdi. Bu barada euro-football.ru habar berýär. Ýatladyp geçsek, çempionat koronawirus pandemiýasy sebäpli ýatyrylypdy. Ýaňy-ýakynda Fransiýanyň hökümeti futboly sentýabra çenli gadagan etdi, şonuň üçin möwsüm wagtyndan öň tamamlandy. Ikinji orny “Marsel” eýeledi, bürünç medala bolsa “Renn” mynasyp boldy.
“PSŽ” özüniň taryhynda Fransiýanyň 9-njy gezek çempiony bolýar. Paýtagt kluby çempion tituly boýunça “Marseliň” yzyndan ýetdi. Titullaryň sany boýunça fransuz öňdebaryjy-diwizionynyň lideri ýurduň 10 gezek iň gowy komandasy bolan “Sent-Etýen” hasaplanylýar.
Bir zady belläp geçmek gerek, Liga 1-iň jemi gazanylan utuklaryň ortaça sany boýunça jemlenildi, sebäbi “PSŽ” bilen “Strasburg” beýleki komandalar ýaly 28 däl-de, 27 duşuşyga gatnaşdylar.
Möwsümiň jemi boýunça Liga 2-ä “Amýen” we “Tuluza” çykarylýar, olar degişlilikde 19-njy we 20-nji orunlary eýelediler. Liga 2-niň çempiony “Lorýan” boldy, ol ikinji ýeri eýelän “Lans” bilen Liga 1-iň geljek möwsüminde duşuşar.
“Tuluzanyň” prezidenti Oliwýe Sadran liga hem-de federasiýa eýýäm hat iberdi, onda şeýle bellenilýär: “27 ýa-da 28 tapgyrdan soň aralyk tablisalara esaslanýan “Tuluzanyň” çykarylmagy baradaky islendik çözgüt adalatsyzdyr, ol mümkin däl we beýle bolmaga esas hem ýok. Klubyň sport göreşindäki öz ornuny gorap saklamak mümkinçiliginden mahrum edilmegi hökman kazyýetde çözülmeli bolar”.
30-njy aprel boýunça Fransiýada koronawirus keseliniň 166 müňüsi hasaba alyndy.