«Formula — 1-iň» täze tertibi hödürlenildi

«Formula — 1» ulag klasyndaky awtoýaryşlar boýunça dünýä çempionatynyň ýolbaşçylygy möwsümi iýulda başlamagy göz öňünde tutýar. Täze sanawa laýyklykda, geljekki tapgyr Awstriýada 3-5-nji iýul aralygynda geçmeli. Bu barada Euronews habar berýär.
«Formula — 1-iň» ýerine ýetiriji müdiri Çeýz Kerri 15-18 ýaryşy diňe bir Ýewropada däl, eýsem, Aziýada, Günorta we Demirgazyk Amerikada geçirmegiň göz öňünde tutulýandygyny habar berdi, möwsüm bolsa Abu-Dabide tamamlanar. Russiýa tapgyry 25-27-nji sentýabra meýilleşdirilen.
26-28-nji iýuna meýilleşdirilen Fransiýanyň Gran-prisiniň ýatyrylandygy habar berildi, çünki koronawirus pandemiýasy sebäpli ýurduň hökümeti, hiç bolmanda, iýulyň ortalaryna çenli köpçülikleýin çäreleri geçirmekligi gadagan etdi. Bu tapgyr hasap boýunça onunjy, ol hem ýatyrylmaly ýa-da şu ýylyň çempionatynyň çäklerinde süýşürilmeli tapgyr boldy. Möwsüm mart aýyndan başlanmalydy. Awstraliýadaky we Monakodaky tapgyrlar ýatyrylmaly boldy, Bahreýndäki, Wýetnamdaky, Hytaýdaky, Niderlandiýadaky, Ispaniýadaky, Azerbaýjandaky we Kanadadaky tapgyrlar bolsa süýşürildi.
19-njy iýula bellenilen Beýik Britaniýanyň Gran-prisiniň tomaşaçysyz geçmegi ahmal.