FIFA futbol federasiýalaryna 150 mln dollar berer

Halkara futbol federasiýasy (FIFA) milli assosiasiýalara koronawirus pandemiýasy döwründe maliýe kömegi hökmünde 150 mln dollar berer. Bu kömek 211 federasiýanyň arasynda paýlaşylar.
Her bir assosiasiýa azyndan 500 müň dollar alar, bu barada FIFA-nyň press-hyzmatyna salgylanmak bilen pravda.ru habar berýär.
“Pandemiýa tutuş futbol bileleşigi üçin öň görülmedik meseleleri döretdi, şonuň üçin dünýä derejesinde ýolbaşçy hökmünde FIFA agyr meseleler bilen çaknyşýanlary goldamaly bolýar” – diýip, FIFA-nyň ýolbaşçysy Janni Infantino belleýär.
“Bu assosiasiýalarymyza gyssagly maliýe kömegini bermegimizden başlanýar, olaryň köpüsi häzirki wagtda düýpli maliýe kynçylyklaryny başdan geçirýärler” – diýip, ol sözüniň üstüni ýetirýär.
“Adaty ýagdaýlarda federasiýalar kesgitli kriteriýalar berjaý edilen ýagdaýynda puly doly möçberi bilen alardylar. Muňa derek FIFA bu puly ähli ýurtda futboly goramak üçin goldaw hökmünde geçirer. Bu FIFA-nyň ýakyn günlerde her bir assosiasiýa 500 müň dollar, şeýle-de 2019 we 2020-nji ýylyň içinde galan islendik tölegleri geçirjekdigini aňladýar” – diýlip, FIFA-nyň resmi saýtynda bellenilýär.
Pandemiýa zerarly tas ähli futbol turnirleri ýatyryldy. Soňky maglumatlar boýunça COVID-19-yň ýaýrawy netijesinde 2 mln 750 müň adam kesellän, 750 müňden gowragy gutulan, 190 müň adam ýogalan.