La Liga we Ispaniýanyň futbol federasiýasy möwsümi tamamlamak barada ylalaşdylar

Futbol boýunça Ispaniýanyň çempionatynyň ýokary diwizionynyň ýolbaşçylygy (La Liga), Ispaniýanyň patyşa futbol federasiýasy (RFEF) we Ýokary sport geňeşi (CSD) ýurduň birinjiliginiň galan oýunlaryny tamamlamak barada ylalaşyga geldiler. Bu barada “Marca” ispan neşiri habar berýär, Trend TACC-a salgylanmak bilen ýetirýär.
Häzirki wagtda Ispaniýanyň çempionaty koronawirus pandemiýasy sebäpli näbelli möhlet bilen saklanyldy. Çeşmäniň maglumatlary boýunça, 18-nji aprelde taraplar sekiz sagatlyk gepleşigi geçirdiler, onuň netijesinde çempionatyň galan oýunlaryny oýnamak barada ylalaşyk gazandylar. Bellenilip geçilişi ýaly, şeýle kararyň esasy sebäpleriniň biri ykdysady jäht bolup durýar, sebäbi pandemiýanyň esasynda ýüze çykan çökgünlik sebäpli Ispaniýanyň hökümeti sport ugrunda möhüm býujetleri taýýarlamaly bolýar, Ispaniýanyň çempionatynyň oýunlarynyň geçirilmeginden gazanylýan girdeji bolsa ýurduň JIÖ-niň 1,37%-ni tutýar.
27 tapgyrdan soň Ispaniýanyň çempionatynyň turnir tablisasynda 58 utuk gazanmak bilen “Barselona” liderlik edýär. Ikinji orny 56 utuk bilen madrid “Realy” eýeleýär, üçünji orunda bolsa 47 utuk bilen “Sewilýa” ýerleşýär.
Täze koronawirus esasynda ýüze çykan kesel 2019-njy ýylyň ahyrynda Merkezi Hytaýda bellige alyndy, 11-nji martda Bütindünýä saglygy goraýyş guramasy ony pandemiýa diýip yglan etdi. Ispaniýada 195 944 kesel ýagdaýy ýüze çykaryldy, 20 453 adam ýogaldy, 77 357 adam gutuldy.