Futbol boýunça Ispaniýanyň çempionatynda öňdebaryjylyk edýän “Barselonanyň” ýarym goragçysy Arturo Widalyň iňlis topary “Nýukasla” geçmegi ahmal. Bu barada Trend TACC-a salgylanmak bilen habar berýär.
Çeşmäniň maglumaty boýunça, 32 ýaşly çilili futbolçy klubyň ösüşi bilen gyzyklanýar, şonuň üçin italýan tälimçisi Massimiliano Allegri topara gelen ýagdaýynda oňa geçmäge razy bolup biler. Häzirki wagtda kluba iňlis Stiw Brýus ýolbaşçylyk edýär. Widala iňlis kluby “Mançester Ýunaýted” we italýan kluby “Inter” hem dalaşgärlik edýär.
Ýaňy-ýakynda “Nýukaslyň” eýesi multimillioner Maýk Eşliniň ony Saud Arabystandan özygtyýarly gazna $377 mln-a satmak barada ylalaşandygy belli boldy. Şeýle-de klub häzirki wagtda işi bolmadyk Allegri bilen şertnama baglaşmak barada gyzyklanýar.
2018-nji ýyldan bäri “Barselonada” çykyş edýän Widal üstümizdäki ýylda ähli turnirlerde 31 oýna gatnaşdy we alty gezek geçiren goly hem-de üç sany netijeli geçirimi bilen bellige alyndy. Mundan öň, ol “Kolo Kolo” çili toparynda, “Baýer” we “Bawariýa” german klublarynda, şeýle-de “Ýuwentus” italýan klubynda çykyş etdi, 2014-nji ýyldan 2019-njy ýyla çenli “Ýuwentus” toparyna Allegri ýolbaşçylyk edipdi. Italiýaly tälimçiniň ýolbaşçylygynda Widal iki möwsümi geçirdi, iki gezek Italiýanyň çempionatyny we Kubogyny utdy hem-de 2014/15 möwsümiň Çempionlar ligasynyň finalisti boldy.
Allegri ýolbaşçylyk eden ýagdaýynda Arturo Widalyň “Nýukasla” geçmegi ahmal
- 21.04.2020 22:43
- 2.6k+
