Ýylyň başyndan bäri Türkmenistan 2 sany halkara kazyýet dawalarynda ýeňiş gazandy

2020-nji ýylyň başyndan bäri, Maýa goýum dawalaryny kadalaşdyrmak boýunça halkara merkeziň tribunaly daşary ýurt kompaniýalary tarapyndan berlen iki sany arza boýunça Türkmenistanyň haýryna çözgüt kabul etdi. Bu barada ArzuwNews agentligi «Squire Patton Boggs» (ABŞ) hukuk kompaniýasynyň 15-nji apreldäki pressrelizine salgylanyp habar berýär. «Squire Patton Boggs» kompaniýasy «Lotus Holding» türk we «Unionmatex» nemes kompaniýalaryna garşy kazyýet dawalarynda Türkmenistanyň bähbitlerini gorap çykyş etdi.
6-njy aprelde Maýa goýum dawalaryny kadalaşdyrmak boýunça halkara merkeziň tribunaly «Lotus Holding» türk kompaniýasynyň 80 million ýewro talap edip beren arzasynyň kanuny esasda däldigini tassyklap, arzany kanagatlandyrmady. Şeýle hem «Lotus Holding» kompaniýasy Türkmenistana kazyýet çykdajylary üçin 1 mln dollar möçberde töleg tölemeli edildi.
Mundan öň, arbitraž kazyýet şeýle hem «Unionmatex» kompaniýasynyň beren arzasyny hem Türkmenistanyň haýryna çözdi. 27-nji ýanwarda kabul edilen karara laýyklykda, «Unionmatex» prosessiň dowam edendigi üçin Türkmenistana 3 mln amerikan dollaryny tölemeli edildi.
Iki keýslerde hem Türkmenistanyň bähbitlerine wekilçilik eden «Squire Patton Boggs» kompaniýasyna onuň hyzmatdaşlary Miriam Harwud, Ali Gursel we Zeýnep Gunaý Sakarýa ýolbaşçylyk etdi. Assistent hökmünde türkmen watandaşymyz Bahar Çaryýewa we onuň hyzmatdaşy Karlos Guzman çykyş etdi. «Squire Patton Boggs» halkara dawalaryny çözmek boýunça halkara arbitraž hukuk kompaniýalarynyň TOP-30-lygyna girýär.
Häzirki wagtda bu firma bankrota düşen «Sehil Inşaat Endüstri ve Ticaret Ltd. Şti.» we «SECE Inşaat ve Ticaret A.Ş.» türk gurluşyk kompaniýalary tarapyndan berlen kazyýet arzalarynda Türkmenistanyň adyndan çykyş edýärler.