Google hususy prosessoryny çykarar

Google hususy prosessorlarynda işleýän smartfonlaryny we noutbuklaryny çykarmakçy bolýar. Bu barada “Axios” neşirine salgylanmak bilen live24.ru habar berýär.
Geljekki çibiň eýýäm 2021-nji ýylda çykmagy mümkin. Insaýderleriň pikiriçe, bu ädim amerikan korporasiýasyna smartfonlary öz çibi bilen ýola goýýan Apple kompaniýasy bilen bäsdeşlik etmäge kömek edip biler. Munuň bilen birlikde Google özüniň ýörgünli dewaýslarynda ulanýan Qualcomm kompaniýasynyň önümlerinden hem ýüz öwürer.
Çeşmäniň habarlaryna salgylansak, geljekki prosessor Whitechapel kodly adyny aldy we ol 5-nanometr tehprosesi boýunça Samsung bilen bilelikde taýýarlanylar. Maglumatlara laýyklykda, prosessorlar 2021-nji ýylda Pixel smartfonunda ulanylar, geljekde Chromebook noutbuklary hem şonuň bilen üpjün ediler. Žurnalistler Google-iň prosessorlary öndüriji-hyzmatdaşlardan doly ýagdaýda ýüz öwürendigi barada aýtmaklyga entek irdigini belleýärler, sebäbi kompaniýa komponentleri taýýarlamakda kynçylyk çekip biler.
Google-iň öz tehnikalary üçin prosessorlary döretmäge ozaldan isleg bildirendigi habar berilýär. Kompaniýa Apple we Intel kompaniýalarynyň ozalky işgärlerini ýygnaýar. Belläp geçsek, amerikan korporasiýasynyň smartfonlarynda Pixel Neural Core we Pixel Visual Core ýaly maglumatlary we maşyn bilimini işläp taýýarlamak üçin çipler eýýäm ulanylýar.