Bloomberg: Apple smartfonlaryň dizaýnyna üýtgeşme girizmegi meýilleşdirýär

Apple korporasiýasy şu ýylyň güýzünde hödürlemegi meýilleşdirýän smartfonlarynyň dizaýnyny üýtgetmekçi bolýar. Bu barada Bloomberg agentligine salgylanmak bilen TACC habar berýär.
Agentligiň maglumatlary boýunça, Apple heniz hem özüniň smartfonlarynyň täze modelini güýzde hödürlemekçi bolýar, bolmasa bu smartfonlaryň tanyşdyrylyşy soňky ýyllardaky ýaly sentýabrda däl-de, COVID-19 sebäpli birnäçe hepdeden soň hem geçirilip bilinýär. Keseliň ýaýramagy we şol sebäpli köp ýurtlar tarapyndan izolýasiýa režiminiň girizilmegi bilen gajetlere bolan isleg pese düşdi, önümçilik zynjyry bozuldy.
Muňa garamazdan, Apple ýylyň ahyryna çenli iPhone 11 Pro we iPhone 11 Pro Max smartfonlarynyň “mirasdüşeri” boljak iki sany öňdebaryjy smartfony hem-de az funksiýaly iki sany arzan modeli bazara çykarmagy göz öňünde tutýar. Bu smartfonlaryň ählisi 5G aragatnaşyk moduly bilen üpjün ediler.
Üýtgeşme has gymmat modelleriň daşky görnüşine degişli bolar: olaryň dizaýny 2018-nji ýylyň iPad Pro planşedini ýada salar. Olaryň ekrany tegelek gyradan mahrum edilip, tekiz görnüşe eýe bolarlar, gajetiň gyralary-da, olaryň burçlary-da tegelek görnüşde bolmaz. Ekranyň ölçegi 6,5 dýuýmdan artdyrylar. Modelleriň ählisi aýratynlygy “hakykata ýakyn” programmalar bilen işlemek üçin täze mümkinçilikden ybarat bolan kämilleşdirilen prosessora eýe bolarlar.
Mundan başga-da, Apple güýzde HomePod kolonkalarynyň hem täze modelini hödürlemegi meýilleşdirýär, olaryň aýratynlygy has ykjam göwrümden ybarat bolar, ýagny ol öňküden iki esse kiçi bolar. Şu ýylda korporasiýa açarlara ýa-da gapjyga olary soňundan smartfonlaryň kömegi bilen tapar ýaly birikdirilýän Apple Tags gurluşlaryny hem bazara çykarmakçy bolýar.