Oppo kompaniýasy Find X2 flagman smartfonynyň has elýeterli wersiýasyny taýýarlaýar

Oppo Find X2 Pro – DxOMark-yň reýtingi boýunça bazarda iň gowy kamerafonlaryň biri. Bu reýtingde apparat diňe Huawei P40 Pro smartfonuna ýol berýär.
Ýaňy-ýakynda Oppo hytaý kompaniýasy Find X2 we Find X2 Pro flagman smartfonlaryny hödürledi. Bar bolan maglumatlara laýyklykda, tiz wagtdan kompaniýa seriýanyň ýene bir gurluşyny, ýagny Find X2 Lite “arzan” flagmany hödürlär. Winfuture.de saýty press-renderleri we bu smartfonuň tehniki häsiýetlerini neşir etdi.
Oppo Find X2 Lite gara we ak reňklerde elýeterli bolar diýip 3dnews saýty habar berýär. Smartfon ekranyň ýokarky bölegindäki 32 Mp frontal kamera üçin damja görnüşli bölek ýere we giň aşaky ramka eýe bolar. Gurluşyň aýnadan edilen yzky panelinde dört obýektiwli esasy kamera ýerleşdiriler. Esasy modul 48 Mp bolar. 8 Mp ýokary derejede giň burçly kamera, makro surata düşürmäni amala aşyrmak üçin 2 Mp sensor we 2 Mp çuňluk datçigi bilen onuň üsti ýetiriler. 
Täze smartfonyň displeýi FHD+ ygtyýarly 6,4 dýuým diagonala eýe bolar. Bu gurluş üçin içki 5G-modemli Qualcomm Snapdragon 765 prosessory ulanylar. Onuň operatiw ýady 8 Gb-a, içki ýygnaýjy apparatyň sygymy 128 Gb-a barabar bolar. Bu telefonuň SIM-karta üçin diňe bir bölek ýere eýe boljakdygy habar berilýär.
Bulardan başga-da, smartfon ekranasty barmaklaryň yzyny skanerleýjä, nauşnik üçin 3,5 mm bölege, NFC-modulyna we Wi-Fi 6-a eýe bolar. Içki batareýiň sygymy 4025 mA/sag bolar. 30 Wt çalt zarýadlanma hem eýe bolmagy mümkin. Find X2 Lite Android operasion sistemasynyň dolandyrmagynda işlär. Bu telefonuň agramy 180 g, ýogynlygy 8 mm bolar.