Duzuň çendenaşa kabul edilmegi immunitete negatiw täsir edip biler

Duzly naharyň köp iýilmegi organizmiň immun sistemasynyň dürli bakterial infeksiýa bilen göreşmek ukybyny peseldip, onuň işine negatiw täsir edip bilýär. Nemes alymlary şeýle netijä geldiler. Makala “Science Translation Medicine” žurnalynda neşir edildi, diýip nauka.tass.ru habar berýär.
Öň geçirilen barlaglar duzuň çendenaşa kabul edilmeginiň hem ýürek-damar keselleriniň ýokary derejeli howpy bilen, hem syçanlaryň akyl taýdan ukybynyň peselmegi bilen baglydygyny görkezdi. Bonn uniwersitetiniň professorynyň ýolbaşçylygynda nemes alymlary ýokary derejeli duzly berhiziň organizmiň bakterial infeksiýalary kabul edijiligine, esasanam, böwrek bakterial infeksiýasynyň giňden ýaýran görnüşleriniň biri bolan pielonefrita nähili täsir edýändigini barlamak kararyna geldiler. Ony “Escherichia coli” içege taýajygy ýüze çykarýar.
Barlagyň birinji tapgyryny alymlar syçanlarda geçirdiler we olaryň bir bölegini ýokary derejeli duzly iýmit bilen naharladylar. Bu bolsa haýwanlaryň pielonefridiň öňünde ejiz gelmegine getirdi. Mundan soňky ekspertleri alymlar adamlarda geçirdiler, olar 20-den 50 ýaş aralygyndaky 10 sany sagdyn erkeklere we aýallara her gün goşmaça 6g duzy tabletka görnüşinde olaryň adaty rasionyna goşup berdiler.
Hepdäniň ahyrynda alymlar barlaga gatnaşyjylaryň gan nusgalaryny aldylar. Hünärmenler esasy ünsi immun öýjükleriniň bir görnüşi bolan organizmi bakteriýalardan goraýan granulositlere gönükdirdiler. Analiziň netijeleri ýokary derejeli duzly berhizi saklan adamlarda granulositleriň öz funksiýasyny ýaramaz ýerine ýetirýändigini görkezdi. Bu bolsa öz gezeginde organizmiň dürli bakterial infeksiýalara garşy durujylyk ukybyny peseltdi.
Alymlaryň bellemegine görä, Bütindünýä saglygy goraýyş guramasynyň maslahat bermegi boýunça, duzuň kabul edilmeginiň normasy günde bäş grama barabar.