Realme özüniň ilkinji “akylly” sagatlaryny çykarmaga taýýarlanýar

Ýaňy-ýakynda Xiaomi kompaniýasy özüniň ilkinji Mi Watch “akylly” sagatlary bilen tanyşdyrdy, onuň yzysüre bolsa bu kompaniýanyň esasy bäsdeşiniň bu meselede öz kararyny taýýarlaýandygy barada gürrüňler ýüze çykyp başlady. Gürrüň Oppo kompaniýasyna degişli bolan Realme brendi we onuň heniz at almadyk ilkinji smart-sagatlary barada gidýär. Ýöne kompaniýanyň özüniň fitnes-trekerini Realme Band diýip atlandyrandygyny göz öňünde tutsak, onda bu täze önümiň hem Realme Watch diýip atlandyrylmagy mümkin. 
Belläp geçsek, bu dewaýs Singapurda IMDA şahadatnamasyndan geçdi. Biraz öňräk bolsa, sagatlar Hindistanda şahadatnamadan geçdi. Bu barada UfaTime.ru neşiri ýazýar.
Bularyň ählisi tiz wagtdan bu gurluşyň bazarda peýda boljakdygyny aňladýar. Ýöne, gynansak-da, bu täzelik barada hiç hili anyk maglumatlar ýok.
Ýatladyp geçsek, Realme-niň “akylly” sagatlary kompaniýanyň Realme 6 Pro-synyň tanyşdyrylyşynyň başlamagyndan öň resmi rolikde “şöhlelendirildi”. Oňa laýyklykda, bu gurluş mehaniki sport sagatlaryny ýada salýan tegelek form-faktora we dizaýna eýe bolar. Syn berijileriň aýtmagyna görä, bu täze sagat Watch Mi bilen diňe bir özüniň tehniki häsiýetleri bilen däl-de, özüniň gymmaty bilen hem bäsdeşlik eder, çünki Realme hilini peseltmezden özüni elýeterli brend diýip tanatdy.