Hytaýda maskada ýüzi anyklaýan ulgam işlenilip düzüldi

Hytaýda ýüzi tanamak wezipesini ýerine ýetirýän elektron gözegçiligiň birnäçe öňdebaryjy sistemalary peýdalanylýar, ýöne olar adamyň ýüzi örtülgi bolmadyk ýagdaýynda, ýagny adaty şertlerde ýokary derejede işleýärler. Hanwang Technology Ltd hytaý kompaniýasy lukmançylyk maskalarynda adamlaryň ýüzüni anyklamaga ukyply bolan ýüz ulgamlaryny hödürledi. Bu barada Reuters habarlar agentligine salgylanmak bilen vestikavkaza.ru habar berýär.
Hanwang Technology kompaniýasynyň (kompaniýa Hanvon ady bilen hem belli) wise-prezidenti Huan Leý ýüzi anyklaýjy sistemanyň kompaniýa tarapyndan eýýäm 10 ýyl bäri işlenilýän tehnologiýanyň binýadynda esaslandyrylandygyny gürrüň berdi. Kompaniýa tehnologiýany döretmek üçin, takmynan, 6 mln açyk ýüzüň maglumatlar bazasyny we maskaly ýüzleriň bazasyny peýdalandy. Goşmaça barlaglardan soň hünärmenlere medisina maskalary bilen ýapylan ýüzi tanamagyň ýokary takyklyk derejesine ýetmek başartdy.
Kompaniýada bu sistemanyň medisina maskaly ýüzi 95% töweregi takyklyk bilen tanaýandygy bellenildi. Bu, elbetde, açyk ýüzleri tanamagyň takyklyk derejesinden pes (99,5% töweregi), ýöne muňa garamazdan, ol ýokary görkeziji hasaplanylýar.
Kompaniýanyň esasy sargyt edijileriniň biri HHR-iň jemgyýetçilik howpsuzlyk Ministrligi bolup durýar. Täze sistema jenaýatkärlikde aýyplanýan adamlary olaryň medisina maskalaryny ulanandyklaryna garamazdan ýüze çykarmaga kömek eder. Bu mesele hytaýlylaryň koronawirus zerarly maska dakýan wagtlarynda has hem möhüm.
Bu ulgam söwda taýdan eýýäm elýeterli. Ol iki wariantda hödürlenilýär: bina girilende gözegçilik üçin ulanylýan birkanally we birwagtda birnäçe kameralar bilen işleýän köp kanally. Işläp düzüjileriň aýtmagyna görä, ikinji wariant her sekuntda, takmynan, 30 adamy tanap bilýär.
Kompaniýanyň wise-prezidenti Huan Leý Pekinde polisiýa işgärleri bilen birlikde, kompaniýanyň 200 töweregi müşderileriniň eýýäm bu tehnologiýany ulanýandyklaryny habar berdi we ýakyn wagtda bu tehnologiýanyň 20 welaýatda peýdalanyljakdygyny sözüniň üstüne goşdy.