Microsoft “janly plitkasyz” Windows 10-y görkezdi

Dizaýndaky bu aýratynlyk Windows Phone döwründen bäri hereket edýärdi.
“Janly plitkalar” Windows 10-yň “Pusk” menýusyna “sekizlikden” geçirildi, onda “janly plitkalar” interfeýsiň esasy bölegi bolup hyzmat edýärdiler. Olar, meselem, “Howa” programmasynyň adaty belgisine derek geljek hepdede boljak howa barada maglumatlary animasiýa bilen birlikde görkezýär, üstesine-de bularyň ählisi kiçiräk penjirede.
Soňky görkezilişinde Windows 10-y işläp düzüjiler sistemanyň täze deslapky ýygyndysyndaky täzelikler barada gürrüň berdiler, bu barada “The Verge” web-saýty habar berýär. Olar “Pusk” menýusyny programma belgileri Fluent Design stilinde täzelenen görnüşde görkezdiler, ýöne esasy detal – bu menýuda “janly plitkalar” ýok, olar “hereketsiz” belgiler bilen çalşyryldy.
Işläp düzüjiler “janly plitkalaryň” heniz sistemanyň bir bölegi bolup galýandygyny bellediler. Ýöne olaryň mundan beýläk nähili boljakdygy belli däl. Belki “Pusk” menýusynyň indiki täzelenmesinde işläp düzüjiler diňe “hereketsiz” belgileri görkezerler, ulanyjylar bolsa islän wagtlary olary “hereketli” plitkalar bilen çalşyryp bilerler. Şeýle-de, indi ähli plitkalar sistema bilen bir reňke boýalan, öň olar dürli reňkdediler.
Microsoft eýýäm Windows 10X sistemasynda iki ekranly kompýuterler ýa-da maýyşgak displeýler üçin niýetlenilen “janly plitkalardan” doly derejede ýüz öwürdi. Onda interfeýs örän sada we ol smartfonlaryň interfeýsini ýada salýar.