Ýagtylygyň tizligine ýetmegiň usuly belli edildi

Bu meselede alymlara kuwwatly daşky energiýa çeşmeleri ýardam berer.
Garward uniwersitetiniň alymlary ýyldyzara gämilerde ýagtylyk tizliginiň derejesine ýetmegiň täze ýoluny mälim etdiler. Olar munuň üçin ýokary şöhlelendirmeli ýyldyzlardan gelýän energiýany ulanmalydygyny aýdýarlar. Bu barada “Science Alert” neşiri habar berdi.
Älem gämileri ýyldyzlardan elektromagnit energiýasyny alyp galýan Gün ýa-da magnit ýelkeniniň kömegi bilen partlama energiýasyny ulanyp bilerler, bu bolsa ýangyç talap etmeýän çekiş we dartyş güýjüni döredýär. Ýene-de bir mümkinçilik şeýle gämileriň tizligini artdyrmak üçin gönükdirilen lazer şöhlesini ulanmakdan we şeýlelikde ýokary tizlige ýetmekden ybaratdyr.
Astrofizikleriň aýtmagyna görä, bir inedördül metrde ýarym grammdan gowrak agramy bolan ýelkenli arş gämisini ýokary şöhlelendirmede partlajak bolup duran ýyldyzdan million kilometr aradaşlykda ýerleşdirilse relýatiwistik tizlige, ýagny ýagtylyk tizligine ýetip bolar. Güýçli şöhlelendirmeli ýyldyzda öndürilýän energiýa we ýagtylyk milliardlarça Günüň bir aýyň dowamynda öndürýän möçberine barabardyr. Gün şemaly Gün ýelkenininiň tizligini bir ýagtylyk tizligine çenli, ýokary şöhlelenmeli ýyldyz bolsa 10 sany ýagtylyk tizligine çenli güýçlendirip biler. Alymlar şeýle-de gerekli matematiki modelleri işläp düzmek bilen ýelkeniň beýleki astrofiziki obýektleriň: toplum ýyldyzlaryň, mikrokwazarlaryň, plerionlaryň (duman bilen gurşalan pulsarlar) we işjeň älem ýadrolaryň kömegi bilen tizlendirilişini hem bahalandyrdylar.
Intensiw şöhlelendirmäniň kömegi bilen ýagtylyk tizligine golaý tizlenmä hem ýetip bolardy, emma munda birnäçe meseleler ýüze çykýar. Meselem, toplum ýyldyzlar ýelken üçin howply bolan sürtülme güýjüni döredýän gaz akymlaryny emele getirýärler. Ýelkenleriň özi hem ýokary derejeli şöhlelendiriji eplenýän materiallardan edilmeli. Gaty bölejikler bilen çaknyşmanyň öňüni almak üçin onuň traýektoriýasyny öňünden oýlanyşykly kesgitläp taýyn etmeli. Emma alymlar nazary taýdan bu problemalary çözüp boljakdygyny nygtaýarlar.