6G ulgamy 5G-den ýüzlerçe esse öňe geçýär

Ýer ýüzünde bäşinji nesliň mobil ulgamy ýaňy bir özleşdirilip başlandy, emma hytaýlylar eýýäm 6G tehnologiýasy barada pikir edýärler. Hytaýyň Ylym we tehnologiýa ministrligi ýaňy-ýakynda geljekki ulgamy ösdürmek üçin taýýarlyk işlerine başlady.
Bilermenleriň aýtmagyna görä, bäşinji nesliň mobil torunda maglumatlary ibermegiň rekord tizliginiň 35 Gbit/s barabar wagtynda 6G torunda maglumatlary ibermegiň ýokary derejesi sekuntda 8000 Gbit/s ýetip biler. Häzirki wagtda 5G torlarynda işe girizilen real tizlik pes derejede.
Sidneý uniwersitetiniň doktory Mahýar Şirmanigoddam şeýle tizligiň internedi peýdalanmakda düýbünden täzeçe ssenariýalary açmaga mümkinçilik berjekdigini we adamlar bilen tehnologiýanyň arasyndaky özara täsir meýilnamasynda rewolýusiýany amala aşyrjakdygyny habar berýär.
Hytaý 6G ulgamynyň çäklerinde geçirilýän derňewlere gözegçiligi alyp barmak üçin iki sany işçi topary döretdi. Toparyň biri degişli pudaklaýyn ministrlikleriň birnäçe ýolbaşçylaryndan ybarat. Ikinji topar uniwersitetleriň, derňew institutlarynyň we tehnologik kompaniýalaryň onlarça ekspertlerini öz içine alýar.
5G ulgamynyň başlangyç ýagdaýdadygyny göz öňünde tutup, 6G ulgamynyň üstünde işlemeklige ir başlandy diýip pikir etmeli däl. Çünki täze nesliň mobil torlaryny işläp taýýarlamaga 10 ýyl töweregi gidýär. Öň 6G ulgamynyň 2030-njy ýylda işe giriziljekdigi habar berildi.