Melburn tehnologik uniwersitetiniň barlagçylary Täze Günorta Uels uniwersitetiniň we Monaşa uniwersitetiniň hünärmenleri bilen bilelikde gazet ýaly çap etmek hem-de eplemek mümkin bolan ýokary derejede ýuka we örän maýyşgak elektron materialyny işläp düzdüler. Bu barada Tech Xplore habar berýär.
Täze tehnologiýa geljekki sensor ekranlar üçin esas bolup hyzmat etmeli. Ol displeýleri taýýarlamak üçin peýdalanylýan häzirki materiallardan 100 esse ýuka. Bu ýokary derejede ýuka bolan sensor panelini taýýarlamak üçin smartfonlarda ulanylýan adaty plýonka peýdalanyldy. Himiki manipulýasiýanyň kömegi bilen oňa tok geçiriji häsiýet berildi.
Barlagçylaryň aýtmagyna görä, alnan material sensor ekranlarynyň önümçiligini ýeňilleşdirip biler. Mundan başga-da, täze tehnologiýany ulanýan smartfonlar tas 10% az energiýa sarp ederler.
Özleriniň taslan önümleriniň «ýaşaýşa ukyplylygyny» tassyklamak üçin alymlar eýýäm işleýän sensor ekrany taýýarladylar. Indi olar täze tehnologiýa üçin patenti resmileşdirmegiň ugrunda. Geljekde taslamanyň awtorlary ony köpçülikleýin bazara çykarmagy we alyjylar harytlaryna – displeýlere, diodlara, Gün panellerine we «akylly aýnalara» girizmegi meýilleşdirýärler.
Alymlar ýokary derejede ýuka maýyşgak displeý döretdiler
- 26.01.2020 20:09
- 3.3k+
