Dünýä ummany sekuntda 5 atom bombasynyň tizligi bilen gyzýar

Dünýä ummany eýýäm bäşinji ýyl yzygiderli ýylaýar. Munuň üçin gerek bolan energiýanyň göwrümi alymlaryň hasaplamalaryna görä, milliardlarça atom partlamalaryna deňdir.
2019-njy ýylda Ýer ýüzüniň ähli ummanlarynyň temperaturasy gözegçilikleriň bütin taryhynyň dowamyndaky rekord görkezijisine ýetdi. Diňe soňky 25 ýylyň içinde ummanlary ýylatmak üçin sarp edilen energiýanyň möçberi Hirosima taşlanan 3,6 mlrd. atom bombalaryna ekwiwalent derejede boldy.
Bu görlüp-eşidilmedik sensasion sanlary Advances in Atmospheric Sciences žurnalynda çap edilen halkara alymlar toparyna salgylanmak bilen Fast Company amerikan neşiri getirýär.
14 alymdan ybarat topar tarapyndan getirilip çykarylan esasy netije soňky on ýylyň dowamynda Dünýä ummanynynyň temperaturasynyň maksimal ululygyna ýetenliginden we şunda ýylylyk derejesi iň ýokary bäş ýylyň gözegçilikleriň soňky bäş ýylyna düşýänliginden ybaratdyr. Dünýä ummanynyň ýylama derejesi 1987-nji ýyldan 2019-njy ýyl aralygynda 1955 – 1986-nji ýyllar bilen deňeşdireniňde 450 % ýokary boldy.
Has anyklyk we aýdyňlyk üçin alymlar şeýleräk düşündirişi hödürlediler: 2019-njy ýylda Dünýä ummanynyň temperaturasy 1981 – 2010-njy ýyllar bilen deňeşdireniňde ortaça 0,075 gradus ýokary boldy. Temperaturanyň hatda şojagaz ujypsyzja üýtgemesi-de 228 sekstillion joul energiýa talap etdi. Deňeşdirip görmek üçin: Hirosimada atom bombasy partlanda 63 trln joul energiýa bölünip çykdy.
Klimatologlaryň ölçemelerine laýyklykda, suwuň ýylamagy Ýeriň ähli ummanlarynda bolup geçýär, ýöne bu hadysa Atlantika we Günorta ummanlarda, esasan-da Antarktidanyň töwereklerinde has-da görnetin ýüze çykýar.