Aşgabatda Türkmenistanyň Prezidentiniň gatnaşmagynda halkara maslahaty geçirildi

14-nji ýanwarda Aşgabatda «Türkmenistan we halkara guramalary: parahatçylygyň we ösüşiň hatyrasyna hyzmatdaşlyk» atly halkara maslahaty geçirildi. Maslahat şu ýylda «Türkmenistan — Bitaraplygyň mekany» şygary astynda geçiriljek Türkmenistanyň hemişelik Bitaraplygynyň şanly 25 ýyllygynyň bellenilmegine bagyşlandy.
Halkara maslahatynyň dabaraly açylyşyna Türkmenistanyň Prezidenti Gurbanguly Berdimuhamedow gatnaşdy.
Maslahata Türkmenistanyň Hökümetiniň ýolbaşçylary we wekilleri, BMG-niň, ÝHHG-niň, Ýewropa Bileleşiginiň, Bütindünýä Bankynyň, Ýewropanyň Täzeleniş we Ösüş Bankynyň, Aziýa Ösüş Bankynyň we beýleki halkara guramalaryň sebitleýin ýolbaşçylary, Aşgabatda akkreditirlenen diplomatik wekilhanalarynyň ýolbaşçylary, ýerli we daşary ýurt KHBS wekilleri gatnaşdylar.
Maslahatyň barşynda Türkmenistanyň Prezidenti söz sözledi. Şeýle-de, BMG-niň Baş Sekretarynyň Merkezi Aziýa boýunça Ýörite Wekili, BMG-niň Merkezi Aziýada Öňüni alyş diplomatiýasy boýunça Sebitleýin merkeziniň ýolbaşçysy Natalýa German, BMG-niň Türkmenistandaky Hemişelik Utgaşdyryjysy Ýelena Panowa, ÝHHG-niň Aşgabatdaky Merkeziniň Ýolbaşçysy Natalýa Drozd, Ýewropa Bileleşiginiň Türkmenistandaky Wekilhanasynyň işleri wagtlaýyn ynanylan wekili Lýubomir Frebort, BMG-niň neşe serişdeleri we jenaýatçylyk boýunça Müdirliginiň Sebitleýin edarasynyň Başlygy hanym Aşita Mittal, ÝUNESKO-nyň Tähran şäherinde ýerleşýän Klaster edarasynyň Başlygy Swetan Swetkowskiý, BMG-niň Bosgunlaryň işi boýunça Ýokary komisarynyň müdirliginiň Sebitleýin Edarasynyň direktory Ýasuko Oda dagylar çykyş etdiler.
Maslahatyň çäklerinde Birleşen Milletler Guramasynyň edaralary bilen Türkmenistanyň Hökümetiniň arasynda Özara düşünişmek hakynda Ähtnamanyň çäklerinde 2020-nji ýylda ýerine ýetirilmeli işleriň Meýilnamasyna gol çekildi.