Tesla Model 3 we Model Y-nyň Ýewropada önümçiligi 2021-nji ýylda başlanar

Geçen ýylyň noýabrynda Ilon Mask Teslanyň Ýewropada Berliniň çäklerinde elektromobilleriň önümçiligi boýunça dördünji kärhanasyny gurjakdygy barada habar beripdi. Kärhananyň guruljak meýdançasy eýýäm belli edildi. Gigafactory 4 kärhanasynyň gurluşygyna geljek alty aýyň içinde başlanylar, awtomobilleriň önümçiligi bolsa, 2021-nji ýylyň iýulynda herekete girer.
Tesla Berlin kärhanasynda Model Y krossowerlerinden we Model 3 sedanlaryndan her hepdede 3000 sanysyny öndürmekçi bolýar. Bu heniz başlangyç görkeziji, geljekde bolsa awtomobilleriň çykarylyş göwrümini ýylda 500 müňe çenli artdyrmak meýilleşdirilýär. Teslanyň Ýewropa meýilnamasy Hytaý meýilnamasyna garanda has uly maksatlary nazarlaýar: Şanhaýda ýaňy-ýakynda gurlan Gigafactory 3 kärhanasy işe girizilenden soň, bu ýerde hepdede 1000 awtomobil öndürmek meýilleşdirilýär.
Ilkibaşda Tesla özüniň ýewropa kärhanasy üçin 3000 adamy işe almagy göz öňünde tutýardy, ýöne önümçiligiň gerimi giňeldilse, onda işe alynjaklaryň sany 8000 adama çenli artar.