6G tehnologiýalary haçan köpçülikleýin elýeterli bolar?

Häzirki wagtda bütin dünýäde mobil torlaryň bäşinji nesli bolan 5G synagdan geçirilýär. Şunuň netijesinde sürüjisiz awtoulaglar, wirtual reallyk we internet biziň durmuşymyza işjeň ornaşýar.
Emma alymlar eýýämden telekommunikasion ulgamlaryň indiki nesliniň — 6G-niň üstünde işläp başladylar. Bu ulgamyň kömegi bilen maglumatlary has hem tiz geçirmäge mümkinçilik berler, diýip «China Daily» hytaý jemgyýetçilik-syýasy gazeti habar berýär.
Bu tehnologiýalar 2030-njy ýylda köpçülikleýin elýeterlilik almazyndan öň, düýpli ylmy-barlaglarda, enjamlary taslamalaşdyrmakda we daşky gurşawa täsiri öwrenmekde birnäçe tehniki kynçylyklary geçmeli. Bu barada sentýabr aýynda Oulu Fin uniwersiteti tarapyndan neşir edilen 6G baradaky Ak kitapda bellenilýär.
Hytaýyň ylym we tehnologiýalar ministrliginde beýan edilişi ýaly, Hytaý 6G boýunça ählumumy ýaryşa goşuldy. Şunuň bilen baglylykda, iki sany ýörite edara döredildi: biri — degişli syýasaty işläp düzmek üçin, beýlekisi — tehniki detallary işläp düzmek üçin 37 sany ekspert kollejlerden, ylmy-barlag institutlaryndan we kärhanalardan ybaratdyr.
Habar beriş serişdeleriň berýän maglumatlaryna görä, «China Telecom», «China Unicom», «Huawei», şeýle hem ABŞ, Russiýa we Ýewropa telekommunikasiýa hyzmatlaryny hödürleýän beýleki kompaniýalar maglumatlary geçirmegiň 6G tehnologiýalary ulgamynda barlaglary geçirýärler.
6G-niň tizligi 125 Gb/s-a barabar bolar. Bu bolsa wirtual reallyga aşa ýokary tizlik bilen girmäge we ýokary tizlikli internet örtügi bilen örtmäge mümkinçilik berer.