«Volkswagen» 2025-nji ýyla çenli 1,5 mln elektromobil çykarmagy meýilleşdirýär

«Volkswagen» kompaniýasy geljek birnäçe ýylyň içinde elektromobilleriň önümçiligi giňeltmek boýunça meýilnamasy barada habar berdi. Awtoöndüriji 2025-nji ýyla çenli elektromobilleriň bazarynda liderleriň biri bolmak üçin bu ugry ösdürmek boýunça işjeňligini dowam etdirmeli bolýar.
«Volkswageniň» resmi saýtynda neşir edilen habarda aýdylyşyna görä, kompaniýa 2023-nji ýylyň ahyryna çenli 1 mln elektromobili çykarmagy göz öňünde tutýar. Öň awtoöndürijiniň wekilleri 1 mln elektrik çekiş güýçli ulag serişdelerini 2025-nji ýyla çenli çykarmagy meýilleşdirilýändigi barada habar beripdi. Indi bolsa awtomobil ägirdi 2025-nji ýylda elektromobilleriň konweýerinden düşürilen 1,5 mln-lyk hasapdan üstün çykmagy niýet edinýär.
Öňde goýlan maksada kompaniýa Ýewropa sebitindäki ýurtlaryň bazarlarynda geljek ýyl peýda boljak ykjam ID.3 elektrokarlary bilen ýetip başlar. Şeýle-de, öndüriji bazowyý wariant bilen deňeşdirilende has köp ätiýaç ýoluna eýe bolan ID.3 modifikasiýalaryny çykarmagy hem wada berdi. Neşir edilen maglumatlara laýyklykda, häzirki wagtda ID.3-i satyn almaga 37 000 deslapky sargytlar gelip gowuşdy. Mundan başga-da, awtoöndüriji MEB elekrik herekete getirijisiniň hususy modul platformasyny beýleki kompaniýalar üçin elýeterli etmekçi, bu bolsa ekologik ulagyň ýaýrama prossesini çaltlandyrar.
Ykjam ID.3-üň gapdaly bilen «Volkswagen» geljekde MEB platformasynyň esasynda mikroawtobuslary, şeýle-de baggileri we elektrik çekiş güýçli krossowerleri çykarmaga taýýarlanýar. Häzirki wagtda kompaniýanyň bu ulag serişdeleriniň önümçiligine haçan başlajakdygy anyk däl.