Türkmenistanyň Prezidenti Olimpiýa şäherçesine baryp gördi

Prezident Gurbanguly Berdimuhamedow paýtagtymyzdaky Olimpiýa şäherçesine baryp gördi we halkara ýaryşlara taýýarlygyň barşy bilen tanyşdy. Şol ýerde öňümizdäki 2020-nji ýylda sport dünýäsinde iri halkara wakalaryň üçüsi bolup geçer. Şolar Sambo boýunça dünýä çempionaty, Futzal boýunça Aziýanyň çempionaty hem-de Dewisiň Kubogy ugrundaky tennis ýaryşynyň tapgyry (Aziýa zolagy/Okeaniýa, IV topar) bilen baglanyşyklydyr.
Döwlet Baştutany şeýle giň gerimli çärelere taýýarlyk görmek işlerine hut özi gözegçilik edýär. Türkmen Lideri aýak üstünde ýolbaşçylar bilen söhbetdeşligiň barşynda işleriň ýagdaýy bilen gyzyklandy hem-de Olimpiýa şäherçesinde işiň dürli ugurlary barada anyk sowallary berdi. Şunuň bilen baglylykda, Prezident birnäçe tabşyryklary berdi.
Sportuň oýun görnüşleri toplumynda milli ýygyndymyzyň agzalary, şol sanda 2020-nji ýylda Tokioda geçiriljek Olimpiýa oýunlarynda Türkmenistana wekilçilik etjek türgenler üçin dürli görnüşli sport lybaslary görkezildi.
Şeýle hem döwlet Baştutanynyň garamagyna halkara ýaryşlaryň geçiriljek binalarynyň bezeginiň taslamalary hödürlenildi. Gurbanguly Berdimuhamedow taslamany gözden geçirip, birnäçe bellikleri aýtdy we käbir düzedişleri girizdi, hususan-da, ýanaşyk şaýollaryň ikisiniň kesişýän ýerinde pyýadalaryň Olimpiýa şäherçesine ýerüsti geçelgesi arkaly bökdençsiz geçmegi üçin ulaglaryň ýerasty geçelgesi boýunça gatnawyny ýola goýmagyň zerurdygyny belledi.
Milli Lider çatrygyň merkezinde paýtagtymyzyň sport babatda ösüşine kybap gelýän sütüni ornaşdyrmak baradaky pikiri aýtdy.
Döwlet Baştutany Olimpiýa şäherçesiniň ähli binalarynyň we olarda döredilen mümkinçilikleriň netijeli peýdalanylmagyna ünsi çekip, sportuň dürli görnüşleri boýunça niýetlenen sport zallarynda türgenleşikleriň yzygiderli geçirilmelidigini belledi.
Gurbanguly Berdimuhamedow sport ulgamyndaky häzirki zaman dünýä meýillerini we Türkmenistanda geçiriljek iri halkara ýaryşlary nazara almak bilen, paýtagtymyzdaky Olimpiýa şäherçesiniň ähli mümkinçiliklerini netijeli peýdalanmak, oňa häzirki zamanyň ösen tehnologiýasyny we sanly ulgamy ornaşdyrmak esasynda bu işleri kämilleşdirmek boýunça anyk görkezmeleri berdi.