Akylly sagatlar we fitnes-bilezikler depginli ýagdaýda meşhurlyk gazanýar

Ýaňy-ýakynda IDC-niň geçiren derňewine laýyklykda, smartfonlaryň bazaryndan tapawutlylykda, intellektual gurluşlaryň segmentleri örän haýran galdyryjy depgin bilen ösmegini dowam etdirýär.
2019-njy ýylyň diňe üçünji çärýeginde üpjünçiligiň göwrümini bir ýylyň içinde 45,2% ösdürip, üpjün edijiler 27,15 million enjam satdylar. Analitik kompaniýanyň hasabatyna görä, bazaryň pese düşjegini görkezýän hiç hili alamat ýok.
IDC analitikleriniň bahalandyrmasy boýunça, 2023-nji ýylda dakylýan gurluşlaryň bazary 200 million birlige ýeter. Bu enjamlara gyzyklanmanyň artmagy bolsa olaryň gündelik durmuşda işjeň ulanylmagy bilen baglydyr. Olar saglyk ýagdaýyna, biometriýa, howpsuzlyga gözegçilik etmekde has hem möhüm roly oýnarlar we elektron tölegleri üçinem işjeň peýdalanylar.
Ýene bir gyzykly zat, başga programmalary götermeýän binýatlyk dakylýan gurluşlaryň sany hem artdy. Şeýle gurluşlaryň umumy göwrümi geçen ýylyň degişli döwri bilen deňeşdirilende, 38,2% ýokarlanyp, 20,97 milliona ýetdi.