Xiaomi we Redmi smartfonlarynda funksional meýilnamalaşdyryjy peýda boldy

Xiaomi kompaniýasy MIUI 11 operasion ulgamlar üçin okuwçylara, talyplara we mugallymlara niýetlenilen täze funksiýasyny ýaýradyp başlady.
Gürrüň senenamanyň, ýazgy kitabynyň we işleri meýilleşdirijiniň funksiýasyny özünde birikdirýän programma barada gidýär. Işläp düzüjiler bu programmanyň standart senenama programmasyndan has funksionallydygyny nygtaýarlar. Onuň bilim bilen meşgul adamlaryň bahalandyryp biljek mümkinçiligi has köp.
Bu programmada ähli sapaklaryň sanawyny saklamak hem-de oňa talyplar ýa-da mugallymlar barada informasiýalary goşmak bolýar. Informasiýalar bilen alyş-çalyş etmek üçin hem amatly funksiýasy bar. Siz düwmäni ýeke gezek basyp öňünden meýilleşdirilen sanawy tutuş topara ýa-da birnäçe synplara paýlap bilýärsiňiz, bu bolsa iş gününiň meýilnamasyny ep-esli ýeňilleşdirmäge kömek edýär.
Täze önümi barlap gören ilkinji ulanyjylar bu programmada amala aşyrylýan ähli zatlaryň hakykatdan hem amatlydygyny aýdýarlar. Mundan başga-da, MIUI standart senenamaly sinhronlaşdyrma hem bar, geljekde beýleki MIUI programmalary bilen integrasiýany ýola goýmagy meýilleşdirýärler. Bu programma bellikleri tiz etmäge we sanawa üýtgeşme girizmäge mümkinçilik berýän ses kömekçisine hem eýe.
Häzirlikçe bu täzeleniş Hytaýyň çäklerinde ýaýraýar, ýöne ýakyn wagtda ol dünýä boýunça ähli smartfonlarda peýda bolmaly.