2020-nji ýylyň 8 — 15-nji iýuny aralygynda Aşgabat şäherindäki Olimpiýa şäherçesiniň Tennis toplumynda tennis boýunça Dewisiň Kubogy ugrundaky halkara ýaryşynyň tapgyry geçiriler. Türkmenistanyň Prezidenti Türkmenistanyň Tennis federasiýasy hem-de Halkara tennis federasiýasy bilen bilelikde gurnaljak bu halkara sport ýaryşyny geçirmäge Sport we ýaşlar syýasaty ministrligine ygtyýar bermek hakynda Karara gol çekdi.
Kararda bellenilişi ýaly, bu resminama halklaryň arasynda dost-doganlygy, hoşniýetli goňşuçylygy has-da pugtalandyrmak, bedenterbiýäni we sporty wagyz etmek, ösüp gelýän ýaş nesli sport bilen meşgullanmaga giňden çekmek, ýurdumyzda olimpiýa hereketini ösdürmek, şeýle hem döwletimiziň halkara sport abraýyny has-da belende götermek maksady bilen, kabul edildi.
Şeýle hem ýokarda agzalan halkara ýaryşynyň tapgyryny geçirmek boýunça guramaçylyk topary döredildi we onuň düzümi tassyklanyldy.
Sport we ýaşlar syýasaty ministrligine Türkmenistanyň Tennis federasiýasy hem-de Halkara tennis federasiýasy bilen ylalaşyp, ýokarda agzalan halkara ýaryşynyň tapgyryny geçirmek baradaky Düzgünnamany taýýarlamak hem-de tassyklamak tabşyryldy.
Aşgabatda tennis boýunça Dewisiň Kubogy ugrunda ýaryş geçiriler
- 19.12.2019 12:02
- 1.9k+
