«Liwerpul» Ýurgen Klopp bilen şertnamasynyň möhletini uzaltdy

Täze baglaşylan şertnama 2024-nji ýylyň tomsuna çenli hereket eder. Deslapky şertnamanyň möhleti 2020/2021 möwsümiň ahyrynda tamamlanýardy.
Premýer ligada «Liwerpul» 1-nji orunda barýar. 2-nji ýerde barýan «Lesterden» 8 utuk öňde.
Nemes hünärmeni «Liwerpula» 2015-nji ýylyň güýzünde gelipdi. Onuň ýolbaşçylygynda mersiýsaýdlylar Çempionlar ligasynyň 2018/2019 möwsüminde final duşuşygynda «Tottenhemden» (2:0) üstün çykyp, ýeňiji boldular, şeýle hem penalti arkaly «Çelsiden» üstün çykyp UEFA-nyň naýbaşy kubogyny eýelediler. Kloppyň ýolbaşçylygynda APL-de «Liwerpulyň» gazanan iň ýokary netijesi geçen möwsümde bolupdy. Şonda «Liwerpul» 97 utuk bilen birinji ýeri eýelän «Mançester Sitiden» bary-ýogy 1 utuk yza galdylar.
Belläp geçsek, «Liwerpulyň» baş tälimçisi Klopp noýabryň netijeleri boýunça Angliýanyň çempionatynyň iň gowy tälimçisi adynda eýe boldy. Onuň ýolbaşçylygynda klub dört oýnuň dördüsinde hem ýeňiş gazandy.
Ýene-de bellemeli zatlaryň biri — «Liwerpulyň» hüjümçisi Sadio Mane hem noýabryň jemleri boýunça APL-iň iň ökde oýunçysy adyny aldy. Geçen aýda ol dört oýunda üç gol we bir ýardam pasyny geçirdi.