Dubaýyň polisiýasynda Tesla Cybertruck pikapy peýda bolar

Dubaýyň polisiýasynyň awtoparkynda Tesla Cybertruck elektrik pikapy peýda bolar.
Dubaýyň polisiýa edarasy geçen hepde hödürlenilen Tesla Cybertruck elektrik pikapynyň nobatyna duranlaryň sanawyna goşuldy. Tiz wagtdan polisiýa işgärleri “broneawtomobili” iş ýüzünde synap görerler. Bu barada maglumat ýerli polisiýanyň resmi Twitter-akkauntynda ýüze çykdy.
Cybertruck-yň tanyşdyrylyş dabarasynda kompaniýanyň ýolbaşçysy Ilon Maskyň habar berşi ýaly, pikap üç modifikasiýada hödürleniler. Bir motorly we yzky herekete getirijili baza wersiýasy Single Motor-yň bahasy $39 900 bolar. Bu pula duran ýerinden 96 km/sag çenli 6,5 sekuntdan az wagtyň içinde bat almaga we iň ýokary 177 km/sag tizligi bermäge ukyply, yzky herekete getirijili, bir elektrik motorly pikap hödürlenilýär. Ätiýaçlyk ýoly 400 km. Tirkegiň mümkin bolan massasy – 3,4 tonna.
Iki elektrik motorly we doly herekete getiriji sistemaly Dual Motor AWD wersiýasynyň bahasy $49 000. Duran ýerinden 96 km/sag çenli awtomobil 4,5 sekundyň içinde bat alýar. Iň ýokary tizligi 193 km/sag, ätiýaçlyk ýoly – 480 km-dan gowrak, tirkege alynýan ýüküň mümkin bolan agramy – 4,5 tonna.
Üç elektrik motorly Tri Motor wersiýasynyň bahasy $69 000. Duran ýerinden 96 km/sag çenli “üçmotorly” 2,9 sekundyň içinde bat alýar we iň ýokary tizligi 209 km/sag berýär. Gidiş uzaklygy 800 km-dan gowrak, tirkegiň mümkin bolan agramy – 6,35 tonna. 402 metr aralygy Tri Motor 10,8 sekundyň içinde geçýär.
Soňrak Tesla Cybertruck-yň kiçeldilen ýük platformaly we birhatarly kabinaly mini-wersiýasynyň ýüze çykmagy mümkin. Şeýle-de kompaniýa syýahaty söýüjiler üçin niýetlenilen pikapyny hem görkezdi.