Skoda çeh awtoöndürijisi kompaniýanyň Citigo iV ilkinji elektrokarynyň önümçiligine başlandygyny habar berdi. Skoda awtomobili gurnamagyň Slowakiýanyň paýtagty Bratislawda, Volkswagen kärhanasynda ýola goýlandygyny aýtdy. Bu elektrokar diňe bäş gapyly görnüşde we Ambition ýa-da Style komplektasiýasynda goýberilýär.
Awtomobiliň uzynlygy 3597 mm-e barabar, beýikligi – 1645 mm.
Ýük goýulýan ýeriniň göwrümi 250 litr, yzky oturgyçlary ýygnamak arkaly ony 923 litre çenli ulaltmak bolýar. Täze awtomobil 83 at güýjüni berýän elektrik hereketlendirijisi bilen üpjün edildi. Badyny artdyrmak 0-dan 100 km/sag çenli 12,5 sekundy eýeleýär, iň ýokary tizlik 130 km/sag ýetýär.
Güýçli agregat litiý-ion batareýiniň 60-amper blogyndan iýmitlenýär. Goşmaça zarýadlamasyz bellenilen ätiýaç ýol 265 kilometre barabar.
Elektrokar kuzowyň reňkine görä reňklenen, tutuşlaýyn radiator gözenegine eýe boldy, täze elektromobiliň ýük goýulýan ýeriniň gapagynda bolsa Skoda diýen ýazgy we iV nyşany bar. Standart komplektasiýasynda Citigo iV dumana garşy faralara we yşyk diodly gündiz ulanylýan çyralara eýe boldy.
Çeh kompaniýasynyň meýilnamasynda 2022-nji ýylyň ahyryna çenli 30-dan gowrak täze görnüşi görkezmek bar, olardan 10 sanysy gibrid ýa-da tutuşlaýyn elektrik hereketlendiriji gurluşa eýe bolar.
Skoda ilkinji elektrokarynyň önümçiligine başlady
- 27.11.2019 21:06
- 1.8k+
