Hindistanda daş-töweregiň görünmezligine getiren we ulag gatnawlaryna zyýan ýetiren goýy tüsse sebäpli 100-den gowrak awiagatnaw ýatyryldy, ýene 300-e golaýy bolsa gijikdirildi. Nýu-Delide we onuň golaýyndaky sebitlerde ýagdaý has kynlaşdy, bu ýerde goýy zäherli tüsse ulag gatnawyny bökdedi diýip, NDTV habar berýär.
Awiagatnawlardan başga-da, tüsse demirýol gatnawyna-da zyýan ýetirdi. Ýollaryň görünmezligi sebäpli Nýu-Delä we ondan ugraýan 90-dan gowrak otly alty-ýedi sagat gijikdirildi.
Awiakompaniýalar ýolagçylara bolup biljek dyknyşyklar sebäpli howa menzillerine ýola düşülende goşmaça wagty göz öňünde tutmagy maslahat berýär.
Häkimiýetler bu ýagdaýa jogap hökmünde howanyň hapalanmagyna garşy göreşmek üçin iň ýokary çäklendiriji çäreleri girizdi. Nýu-Delide we Milli paýtagt okrugynda gurluşyk we sökmek işleri togtadyldy. Döwlet we hususy guramalaryň işgärleriniň ýarysy uzak aralykdan işlemek düzgünine geçdi, 11-nji synpa çenli mekdep okuwçylary bolsa garyşyk formatda okap başlady.
Hindistanyň Meteorologiýa departamenti sebitde howpuň «mämişi» derejesini yglan etdi.
