Modeliň önümçiliginiň bes edilmegi baradaky myş-myşlara garamazdan, Hyundai kompaniýasy Sonata sedanynyň dokuzynjy nesliniň üstünde işlemegini dowam etdirýär. Kompaniýa awtoulagy öz hatarynda saklap galmak, ýöne onuň konsepsiýasyny düýpli täzelemek kararyna geldi.
Täze Sonata “Art of Steel” (Polat sungaty) dizaýn stilinde bolar. Bu stil futuristik elementleri 1980-nji ýyllaryň ortalarynda çykarylan ilkinji nesil modeliniň keşbi bilen utgaşdyrýar. Awtoulagyň daşky görnüşi ep-esli derejede "burçly" bolar: oňa Ioniq 5 we N Vision 74 konseptindäki ýaly ýiti çyzyklar, aýdyň gyralar we göni çyzykly (kwadrat) siluet mahsus bolar diýlip garaşylýar.
Düýpli üýtgeşmeler tehniki tarapyna hem täsir eder: Hyundai arassa benzinli hereketlendirijilerden doly ýüz öwrer. Sonata-nyň dokuzynjy neslini diňe gibrid ulgamlary — öz-özi zarýad alýan (HEV) we elektrik ulgamyna birikdirilýän (PHEV) hereketlendirijiler bilen hödürlemek meýilleşdirilýär. Deslapky maglumatlara görä, sport görnüşli N Line wersiýasy hatda doly elektrikli hereketlendiriji ulgamyna hem eýe bolup biler.
Häzirki Sonata bolan isleg barha azalýar. Mysal üçin, ABŞ-da sekizinji nesil modeliniň satuwy bir ýylyň dowamynda 12%, diňe noýabr aýynda bolsa 42% azaldy. Kompaniýa täzelenen dizaýnyň we gibrid tehnologiýalarynyň modele bolan gyzyklanmany täzeden dikeltmäge kömek etjekdigine umyt baglaýar.
