Strategik hyzmatdaşlygy giňeltmek — Merkezi Aziýa ýurtlarynyň daşary işler ministrleriniň üns merkezinde

Daşkent şäherinde Merkezi Aziýa ýurtlarynyň Daşary işler ministrleriniň duşuşygy geçirildi. Onuň dowamynda Merkezi Aziýa ýurtlarynyň daşary syýasat edaralarynyň baştutanlary syýasy-diplomatik, söwda-ykdysady we medeni-ynsanperwer ulgamlaryndaky hyzmatdaşlygyň wajyp ugurlaryny ara alyp maslahatlaşdylar. Mundan başga-da, energetika we ulag howpsuzlygy, maýa goýum ýagdaýynyň kämilleşdirilmegi, ekologiýany gorap saklamak ýaly halkara gün tertibiniň möhüm ugurlarynyň üstünde hem durlup geçildi. Bu barada Türkmenistanyň DIM-niň saýty habar berýär.
Taraplar sebitde ykdysady ösüşi, durnuklylygy we howpsuzlygy saklamak üçin strategiki hyzmatdaşlygy giňeltmek mümkinçiligine seredip geçdiler. Merkezi Aziýa döwletleriniň baştutanlarynyň geljekki maslahatyna taýýarlyk görmek meselelerini aýratyn nygtadylar.
Türkmenistanyň Daşary işler ministri öz çykyşynyň dowamynda dostluk, hoşniýetli goňşuçylyk we özara hormat goýmak ýörelgeleri bilen esaslandyrylan Merkezi Aziýa ýurtlarynyň utgaşdyrylan hyzmatdaşlygynyň möhümdigini hem-de bu sebitiň geosyýasy, ykdysady we ulag-logistiki mümkinçilikleriniň ähmiýetini belledi.
Şeýle-de taraplar gönüden-göni tutuş Ýewraziýa yklymynyň ösüşine täsir edýän, sebitiň hemmetaraplaýyn kämilleşdirilmegine gönükdirilen bilelikdäki alyp barýan işlerini dowam etmek barada ylalaşdylar.