Volkswagen ID 3 elektrokaryň seriýaly öndürilişini işe girizdi

ID.3 nemesleriň täze MEB platformasynda gurlan ilkinji tapgyrlaýyn elektrokary boldy.
Hetçbekleriň ilkinji toplumy noýabrda Swikkau kärhanasynda çykarylar. Awtomobiller satuwa 2020-nji ýylyň ortalarynda girişerler, nemes brendiniň press-gullugy habar berýär. Müşderileriň eýýäm 35 000-den gowrak elektrokarlary öňünden belläp goýandyklaryny hem belläp geçmek gerek.
Awtomobil barada umuman aýdylanda, elektrokar ululygy boýunça “Golf” bilen deňleşer. Bäş gapyly hetçbek tekiz batareýleri ulanar, ol awtomobiliň polunyň aşagynda ýerleşýär. Ol awtomobiliň içki giňişligini artdyrmak üçin edilen.
Tehniki häsiýetleri barada aýdylanda, elektrokar müşderilere üç wersiýada hödürleniler: zarýadlamasyz degişlilikde 330, 420 we 550 km geçmäge mümkinçilik berýän 45, 58 we 77 kWt/sag akkumulýatorly. Elektromotoryň kuwwatlylygy 150 we 204 at güýüne barabar. Ulagyň esasy wersiýasynyň tizligi sagatda 160 km-e barabar.
Belläp geçsek, ýaňy-ýakynda Volkswagen nawigatorlar üçin kwant kompýuterini hem döretdi. Konsern kwant hasaplamalarynda döredilen nawigatorlaryň testleşdirmesine başlady. Eksperiment Lissabonda Web Summit tehnologiki konferensiýa wagtynda geçiriler.
Adaty nawigasion ulgamlar şeýle prinsip boýunça işleýärler: olar has işjeň ýollary tapyp, anyk ýerde ýerleşýän ähli sürüjileri şondan ugrukdyrýarlar. Kwant mehanizmi biraz başgaçarak işleýär – ol ulanyjylar üçin ýoluň personifikasiýalaşdyrylmagyna gönükdirilendir. Ýagny, ol her bir sürüji üçin indiwidual ýoly görkezmeli. Beýle usul ýol ulgamlaryna oňaýly täsir etmäge we ýol dyknyşyklarynyň döremeginden gaçmaga mümkinçilik berer.
Eksperimentiň çäklerinde täze ulgamy dokuz sany jemgyýetçilik transportunyň ýerli operatorlarynyň awtobuslarynda synap görerler. Olar Kanadanyň D-Wave Systems kompaniýasynyň kwant kompýuterleri bilen baglanyşykly bolar. Transport Web Summit konferensiýasynyň geçiriljek ýerini şäheriň dürli bölekleri bilen baglanyşdyrýan dört ugur boýunça gatnadylar.