Türkmenistanda Telekommunikasiýalar we informatika instituty döredildi we beýleki ÝOM-laryň düzümi üýtgedildi

Türkmenistanyň Prezidenti Ylymlar akademiýasynda ýurdumyzyň ylmy jemgyýetçiligi bilen geçiren duşuşygynyň çäginde ýokary okuw mekdepleriniň gurluş-düzümini üýtgetmek hakynda resminamalara gol çekdi. Netijede, senagat-kommunikasiýa toplumynyň bäsdeşligini ýokarlandyrmak, maglumat-kommunikasiýa serişdelerini döwrebaplaşdyrmak, sanly tehnologiýalary ykdysadyýetiň dürli pudaklaryna ornaşdyrmak we olara hyzmat etmek üçin hünärmenleri taýýarlamak maksady bilen «Türkmenistanda Telekommunikasiýalar we informatika institutyny döretmek hakynda» Permana gol çekdi.
Ykdysadyýetiň sanly düzümlerini ösdürmek, hünär taýýarlykly inženerleri we ulag we ýaşaýyş-kommunal pudaklary üçin tehnologlary taýýarlamaklygy kämilleşdirmek maksady bilen türkmen Lideri «Türkmenistanyň Jemagat hojalygy institutynyň adyny Türkmenistanyň Inžener-tehniki we ulag kommunikasiýalary instituty adynda üýtgetmek hakynda» degişli karara gol çekdi.
Köpçülikleýin bedenterbiýäni we ýokary netijeler sportyny ösdürmek, ýokary derejeli hünärmenleri, sport ussatlaryny, tälimçileri we sportuň olimpiýa görnüşi boýunça türgenleri taýýarlamaklygy kämilleşdirmek maksady bilen «Türkmenistanyň Milli sport we syýahatçylyk institutynyň adyny Türkmen döwlet bedenterbiýe we sport institutyna üýtgetmek hakynda» karara gol çekildi.
Türkmenistanyň Prezidentiniň belleýşi ýaly, ýurdumyzda syýahatçylygy ösdürmeklige aýratyn ähmiýet berilýär. Şunuň bilen baglylykda, ýurdumyzda syýahatçylyk ugurlarynyň geografiýasyny giňeltmek, hyzmatlaryň hilini ýokarlandyrmak we görnüşlerini köpeltmek, ýurdumyzyň bu pudagy üçin hünärmenleri taýýarlamaklygy kämilleşdirmek maksady bilen «Türkmen döwlet medeniýet institutynyň işini döwrebaplaşdyrmak hakynda» karara gol çekildi.